Kohhran in sak chawlhsan turin ti

Aizawl Municipal Corporation (AMC) chuan The Mizoram Municipalities Act, 2007 tlawhchhanin Jehova Shalom, Assembly of God, Chaltlang Secretary chu protected area chhunga phalna la hmasa loa in an sak mek chawlhsan tur leh insawifiah tura hriattirna June 4, Thawhlehni khan a pe.

Social activist Vanramchhuangi chuan Aizawl Master Plan-in a humhalh, Chanmari-Chaltlang inkar leh Bawngkawn-Durtlang inkar kawngpui kamah dan loa in sak a awm thu June 3 khan AMC Commissioner hnenah ziakin a thlen a; chu chu AMC chuan an bawhzui a ni.

Jehova Shalom, Assembly of God hian Chanmari-Chaltlang inkar kawngpui bul, Chaltlang huam chhunga protected area chhungah phalna la hmasa loa in (RCC building) an sak avangin in sak chu chawlhsan nghal turin AMC chuan a hriattir a; an laka dan anga hmalak a nih loh chhan tur insawifiahna June 21, 2024 ral hmaa thehlut turin a hriattir bawk.

Vanramchhuangi chuan, Chanmari-Chaltlang inkar leh Bawngkawn-Durtlang inkar kawngpui kamte chu Aizawl Master Plan (Vision 2030)-in development control lekkawhna hmun tura a puan a nih thu te, kawngpui aṭanga ft. 50 chinah in sak phal a nih loh thu te, kawng hnuai/thlang lamah in sak a nih in kawng zàwl/àn aṭanga ft. 20 aia sanga sak phal a nih loh thu te, kawngpui aṭanga ft. 50 aia hlaah in sak a nih dawn pawhin s him leh him loh structural engineer-te'n an endik hmasa ang a, a hima an ngaihah chauh in sak phal a nih thute a tarlang.