Election leh RO-in lawmthu an sawi

Mizoram parlia­men­tary consti­tuency-a Lok Sabha inthlanpui leh a kaihhnawih thil zawng zawng tluang taka neih zawh a nih chung­­changah Mizoram Election department leh retur­ning officer Nazuk Kumar, Aizawl DC-te chuan lawmthu an sawi.

Election department chuan, Mizoramah boruak muanawm tak hnuaiah June 4, 2024-ah vote chhiar a nih thu an tarlang a, "Tuichang Assembly segment, Khaw­zawl district-ah vote chhiar zawh hma­sak ber niin, zing dar 8:55 khan an chhiar zo a, chhun dar 12 hma khan vote chhiar zawh thaw­khat niin, result tlang­pui pawh a hriat theih tawh. Chak leh mumal nei zawka vote chhiar a ni ta hi thil lawm­­awm tak a ni," an ti.

Election Commission of India-in March 16, 2024-a Lok Sabha inthlanpui a puan aṭanga inthlan kaihhnawiha thawktu official te, political party, security force, media, kohhran, MPF leh tlawmngai pawlte fakawm an tih thu leh mipui chungah an lawm thute Election department chuan an tarlang.

Lok Sabha inthlana Mizorama returning officer (RO) Nazuk Kumar chuan, tluang tak leh hlawhtling taka inthlan a nih theihna tura hma latu zawng zawng chungah a lawm thu a tarlang a, "CEO office-in min kaihhruaina te, DC/ARO-te leh Aizawl district-a ARO ṭha tak takte min ṭawiawmna hlu tak avangin an chungah lawmthu ka sawi. Team hrang hranga nodal officer te, Assembly segment tina officer-te leh master trainer te, sector officer-te leh Election officer zawng zawng bakah, Aizawl DC office staff-te chungah min ṭawiawmna ṭha tak avangin lawmthu ka sawi a ni," a ti.

RO chuan, polling official, counting official, IPR, PHE leh PE department te, Aizawl Civil Hospital, Fire & Emergency Services, Aizawl SP leh Traffic SP, department leh office dang aṭanga puitute chungah a lawm thu a tarlang bawk.