Vote tla a ṭhat theihna atan cheng nuai 58.49 hman a ni

Lok Sabha inthlanpui neih zawh takah vote tla a ṭhat theihna atan Mizoram chhungah cheng nuai 58.49 hman ral a ni.

Vanglaini-in RTI Act tlawh­chhana a zawhna chhángin Election department chuan, "Lok Sabha MP inthlan neih zawh tâkah khan vote tla a ṭhat theihna atana hmalakna hrang hrangah CEO Office chuan cheng nuai 6.65 a séng. District hrang hranga vote tla a ṭhat theihna atana sum sen belh khawm chu cheng nuai 51.84 a ni," an ti.

Chief Electoral Officer pisa leh district hrang hranga sum sen belh khawm hi cheng nuai 58.49 a ni.

Zawhna chhannaa a lan danin, sum sen tamna ber Lawng­tlai district-ah Rs 12,44,940 hman a ni a; Lunglei district (Rs 11,18,815) leh Aizawl district (Rs 10,27,884)-te'n an dawt.

Sum sen tlemna ber Siaha district-ah Rs 60,000 hman a ni a; Hnahthial district (Rs 73,000) leh Saitual district (Rs 1,26,370)-te'n an dawt a ni.

CEO OFFICE SUM SENNA ṬHENKHAT

1. MZP, Tlabung nen thawk hoin April 6, 2024-ah Tlabung leh a chhehvel khuaa zirlaite pualin Youth Meet huaihawt a ni a, poll pledge, mock poll, voting oath an nei. CEO Office chuan Tlabung MZP hnenah Rs 30,000 a pe.

2. Mizoram Cycling Association nen April 13, 2024-ah Cycling Rally for GELS, 2024 an huaihawt a, Rs 85,000 hman a ni.

3. Chanchinbu leh cable TV-a advertisment tihchhuahna atan Rs 2,52,000 an hmang.

4. District hrang hranga DEO-te tan district level SVEEP & Media Competition buatsaih a ni a, lawmman atan Rs 60,000 sem a ni.

5. BLO-te tan Voter Turnout Competition buatsaih a ni a, lawmman atan Rs 35,000 sem ral a nih bakah, BLO-te lawmman la tura Aizawl an kalna senso atan Rs 24,000 hman a ni.

6. DEO leh BLO-te tana inelna buatsaihah thuchei siamtirna atan Rs 4,500 leh bouquet siamtirna atan Rs 7,400 an hmang.