June chhungin kuhva kudam tihtawp phût; Awlsam taka police checkgate paltlangah ngai

7th June, 2024

Hachhek Bial Kuhva Chingtu Pawl, Vairengte Kuhva Chingtu Cooperative Society leh Bilkhawthlir Kuhva Chingtu Cooperative Society-te chuan, ram dang kuhva dan loa lak luhte dahna kudamte June 2024 chhunga titawp turin sorkar an phût a, kuhva tawlh ru ṭhinte'n awlsam takin police check gate-te an paltlang nia an ngaih thu an tarlang.

Kuhva chingtute chuan nimin khan Vairengteah joint meeting neiin, resolution an siam a; Mizoram chhunga dan loa lak luh kuhva rah dahna kudamte June 30, 2024 ral hmaa sorkarin a tihtawp loh chuan hnatlang an koh tur thu tarlangin, "Dan loa lak luh kuhva phur ṭhinte'n Mizoram Police checkgate awlsam takin an kaltlang ṭhin niin kan hria," an ti.

KUHVA CHINGTUTE RESOLUTION

- Dan loa kuhva lo lut ṭhin leh tawlh ru ṭhinte dang turin inlungrual takin theihtawp kan chhuah zel dawn. Mizoram sorkarin dan loa kuhva tawlhte titawp tura hma a lakna leh kut hnathawktute aw a ngai pawimawh ṭhin hi lawmawm kan ti. Dan loa kuhva tawlh ṭhinte pawh kuhva tawlh ruk bànsan turin kan ngen.

- Kan eizawnna ber kan kuhva thar hralhnaa harsatna min siamtu, dan loa ram dang aṭanga kuhva lak luhte tihtawp a nih thuai theih nan Mizoram sorkarin hma la rawh se. Mizoram chhunga dan loa kuhva lak luh stock-na kudam hmun eng emaw zatah a la awm niin kan hria a, kudamte hi June 30, 2024 ral hmaa titawp vek turin Mizoram sorkar kan ngen. Sorkarin kuhva ro stock-te mana a titawp lo a nih chuan kuhva chíngtute'n a ṭul angin hnatlang a ko ang.

- Dan loa kuhva ro tawlh chungchanga social activist Vanramchhuangi’n Gauhati High Court Aizawl Bench-a PIL a thehlut kha lawmawm kan ti. He thubuai hi CBI chhui remti ngei turin Mizoram sorkar kan ngen.

- Dan loa lak luh kuhva phur ṭhinte'n Mizoram Police checkgate awlsam takin an kaltlang ṭhin niin kan hria. Police checkgate-te enfiah a, tun aia rintlak leh chak zawka thuam ṭha turin Mizoram sorkar kan ngen.

- Tun hnaia kuhva chingtu pawl ding thar, Mizoram Arecanut Growers Association (MAGA) hi keini chuan kan hriatpui lo.