2023-ah POCSO Act thubuai 112 a lut

Lunglei District Child Welfare and Protection Committee chu nimin khan district bawrhsap Ramdinliani hoin DC conference hall-ah an ṭhukhawm. Mizoramah kum 2024 khan POCSO Act hnuaiah thubuai 112 leh kuminah thubuai 12 ziah luh a ni tawh a, naupang pawngsual thubuai pathum ziah luh a nih tawh thu tarlan a ni.

Lunglei Bawrhsap chuan, naupang kaihhruai dan leh enkawl dan bakah, khawtlangah mi ṭha leh hman tlâk an chhuak tam lo lutuk chu inenfiah a ngaih niin a sawi a, "Nu leh pate'n an naupan lai aṭanga enkawlna leh zirtirna ṭha an pek a ngai a, eng nge an tuipui tihte kan hriatpui a ngai," a ti.

Ṭhutkhawma tarlan danin, Mizoramah kum 2023 khan Protection of Children from Sexual Offences Act (POCSO Act) hnuaiah thubuai 112 ziah luh niin, naupang pawngsual (minor rape) thubuai pathum ziah luh a ni a; kumin 2024-ah POCSO Act hnuaiah thubuai 12 ziah luh a ni tawh. Lungleiah home paruk awmin, naupang 129 an awm mek a, mipa 80 leh hmeichhia 49 an ni.

Meeting-ah hian sorkar leh mimal sikulah Nodal Teacher for Child Protection ruat an rêl a; District Education Officer chu ruahmanna siam tura tih niin, District Child Protection Unit chu training buatsaih sak tura tih a ni.

Dan loa ram chhung leh páwna naupang lak luh leh thawn chhuah chungchangah naupang vèn leh vil kawngah hmalak ni se, an ti a; Lunglei district-ah Task Force on Child and Adolescent Labour (Prohibition and Regulation) Act, 1986 din a nih tawh thu tarlan a ni bawk.

POCSO Act, naupang chhawr (child labour), child marriage, naupang hralh (child trafficking), ruihhlo, HIV/AIDS leh vaihlo chungchangah sikul leh kohhranahte zirtirna tam zawk buatsaih an rêl a ni.