KHAWTHLIR

Kuhva phurh khap

Serchhip bawrhsap David Lalthantluanga chuan thupek chhuahin, Serchhip district khaw hrang hrangah dan loa kuhva phur lirthei an kal ṭhin tih hriat a nih thu a tarlang a, "Serchhip district chhung khawi hmunah mah dan ang ni loa kuhva lak luh leh phurh khap a ni," a ti. Thupek zâwm lote chu IPC Section 188 hmanga hrem theih an nih thu a tarlang bawk.

Income Tax office

Income Tax Office (TDS), Aizawl chu Bawngkawna J Thankima College bulah hawn a ni a, income tax chungchanga hriat duh leh harsatna nei tan pan theih a nih thu tarlan a ni. Phone number 0389-2916038-ah biak theih a ni bawk.

Kawngpui endik

Serchhip District Road Protection Squad Team C chuan nimin khan an leader Dr Marilyn Lalruatkimi, SDC hoin Serchhip Kawnpui, Chhimveng leh Hmarveng VC huam chhunga kawngpuite him leh him loh leh, vantlang tana hnawk thama kawngpui nêk an awm leh awm lohte an endik. Kawngpui pawimawh zual leh lûn laia lirthei leh mipui veivahna atana hnawk thei thil dahtute chu senghawi turin an hriattir a ni.

Pass vek lawm

Republic Higher Secondary School, Aizawl chuan nimin khan Ramhlun South YMA Hall-ah kumin HSSLC result chhuaka science stream-a an zirlaite an pass vek an lawm a, zirlai tharte lawmna hun an hmang nghal. Principal C Lalhliapa chuan, sorkar sikul bikah 100% pass awm chhun an nih thu a sawi.

Corporator-in tlawh

AMC Ward-VIII corporator Christina Roluahpuii Sailo chuan nimin khan a bial chhunga sorkar sikul hrang hrang a tlawh a, an mamawhte a enfiah bakah, thawktute an mamawh a zawt. Christina Roluahpuii chuan, sikul thuneitute theihtawp a chhuahpui bakah, School Education Minister leh bialtu MLA hnenah an mamawhte a thlen tur thu a hrilh.

Tanpuina pek dan tur sawiho

Saitual District Disaster Management Authority chu June 5, Nilaini khan an chairman Dr Lalngura Tlau, bawrhsap hoin an ṭhukhawm a; tun hnaia khualrel chhiatna thleng kaihhnawihah State Disaster Response Fund kaltlanga ṭanpuina pek dan tur sawiho a ni.

Heroin & meizial

Assam Rifles-te chuan nimin khan Melbuk huam chhungah ram dang beer báwm 79 leh ram dang meizial bawmpui panga an man a, Rs 9,34,000 hû a ni. AR sipaite chuan June 5, Nilaini pawh khan Zokhawtharah heroin (no. 4) gram 25 an man bawk a, Rs 17,50,000 hû a ni.