CYMA-in Tlawng tui pump-na an tlawh; Zotrek-in Tlawng tui pump-na hmun thian

Tun hnaia ruahsur nasain Aizawl khawpui tui tlan tur lakna Greater Aizawl Water Supply Scheme Phase-I chhehvela hnáwl a chhêk khawmte chu June 5, Nilaini khan Central YMA hruaitute'n an tlawh a, nimin khan Zotrek adveture club-in an thian.

Zotrek member-te chuan tuilianin GAWSS Phase-I bawr vel leh khawl awmna vela hnáwl a dahte chu an thian a, a ṭul angin PHE department-a thawkte'n an ṭawiawm. Zotrek hruaitute chuan, Aizawl khawpui châwmtu tui pump chhuah chu mi tinin an mamawh bulpui petu ber a ni a, then fai chu an mawhphurhnaah ngaiin hnatlang an ko tih an sawi.

PHE tui pump-na hmun hi Central YMA hnuaia Health & Sanitation Sub-Committee member-te pawhin June 5, Nilaini khan an tlawh a, PHE department engineer-te'n an lo dawngsawng.

CYMA tarlan danin, phase-I ah hian store room pahnih hi tuilian hian a ti chhe hneh hle a, spare part hlu tak tak eng emaw zah a len bo bakah store room bula an khawllian dahte pawh tuiin a chim vek avangin tun maiah chuan a chhiat that hre turin tih nun ngam a la ni lo.

Phase -I a tui pump khawl electric hmang pahnihte hi tui in a chim ve bawk avangin technicianten a chhiat dan an chhui mek a, khawl hi eng chen nge hman theihloha a awm tur hi ala hriat loh.

Backup pump (diesel hmang) pahnih an neih ah pakhat hi a chhia a, pakhat chauh hman theihin a awm rih. Tun tum tuilian hi kum 2017 a tuilianin a chim chin aiin feet 5 chuang a sang a chim a ngaih ani.

Thawktu ten theihtawp an chhuah zarah karkhat chhungin 85% capacity-in phase-2 pump thawk thei a siam hman a ni. Amaherawhchu hei pawh hi tui nut dan a zirin a danglam thei thung. Tui a nut deuh hian phase-II a pump pakhat leh phase-I a diesel pump khawl hmangin tui an pump ṭhin a, phase-II pump pahnih 85% a an pump hian nikhat ah maktaduaih 18 vel an pump thei ni a hriat a ni.

PHE department hotute chuan, tun hnaia tuilianin tui pump-na hmun a tihchhiat leh a len bote chu cheng vbc. 13 vel hû a nia an ngaih thu an sawi.