MNYF-in dan kalha chêah Tourism Minister an puh

Mizo National Youth Front (MNYF) chuan thuchhuah siamin, dan kalha cheah Tourism minister Lalrinpuii an puh.

MNYF chuan, Tourism Minister-in a department chan subject ni lo, Art & Culture department subject daihah thutlûkna mipui hmaah a puang nia sawiin, "Chu chu Anthurium Festival titawpa, a aiah Leitlangpui Music Festival neih tur thu a puan chhuah kha a ni," an ti.

Mizoram Allocation of Business Rules 2019-ah music chu Art & Culture thuneihna a nih thu RTI Act zawhna Art & Culture department-in an chhannaah tarlan a nih thu tarlangin MNYF chuan, "Leitlangpui Music Festival buatsaih tur pawh hi official-a an hriatpui loh thu RTI Act channaah an tarlang," an ti a; Art & Culture minister C Lalsawivunga palzûtah an puh.

MNF ṭhalaite chuan, anthurium chu Horti­culture department subject a nih thu tarlangin, "Anthu­rium Festival pawh Tourism department leh Horticulture department ṭang ruala huaihawt ṭhin a ni. Tourism Minister- in Horticulture Minister, department official leh anthurium chingtu society-te pawh ráwn loa ama thu thua a titawp ngawt mai hi thuneihna hman sualna a ni," an ti.

Lungleia Music Festival neih pawh ṭha an tih thu tarlangin MNYF chuan, "Dan ding lai angin Art & Culture department ngeiin huaihawt se kan ti," an ti a, Anthurium Festival tihtawp phah kher ngai loin, a subject neitu Art & Culture department-in huaihawt zawk se a ṭhat an rin thu an tarlang.

MNYF chuan, Tourism Minister-in music festival chungchanga thutlukna a siam chu kalphung ṭha lo tak nia tarlangin, Val Upa Council-te zilhhau leh Chief Minister-in action a lak an phût thu an tarlang bawk.