MZP-in hnam làm intihsiak an buatsaih

Mizo Zirlai Pawl (MZP) Gen. Hqrs chuan June 5-6, 2024 khan Dawrpui Multipurpose Hall-ah hnam lâm intihsiak an buatsaih a; nimin tlai khan kharna inkhawm buatsaih niin, Art & Culture minister C Lalsawivunga'n a hmanpui.

Intihsiakah hian Cheraw (Buhza-aih) leh Solakia/Sawlakia hmangin intihsiak a ni a, cultural club 12 an tel. Pakhatna Kawllen Cultural Club-in Rs 70,000, pahnihna Mizo Cultural Club, Vaivakawn-in Rs 50,000 leh pathumna Huiva Cultural Club, Aizawl College-in Rs 30,000 an dawng a; intihsdiaka tel zawng zawngin Rs 3,000 an dawng bawk.

Art & Culture minister C Lalsawivunga chuan, MZP-in hnam lâm intihsiak an buatsaih chuan rah ṭha a chhuah a beisei thu sawiin, "Ram changkang leh ropui apiangin an hnam zia leh nun dan an ngaisang a, an hnam lâm leh ziate an humhalh a, an chawi sáng ṭhin," a ti.

Minister chuan, zirlaite chu Mizo hnam zia leh lâmte humhalh chunga an zirlai thlahthlam lo tur leh, ruihhlo leh eirukna laka fihlim turin a fuih bawk.

MZP president H Lalthianghlima chuan intihsiak an buatsaih chhan sawiin, "Mizote hi hnam tlem kan ni a, kan hnam nun zia ṭhate kan humhalh a, kan hnam làmte kan chhawm nun hi kan mawhphurhna a ni a, kan hnam humhalh nan kan làm mawi tak takte chawisan kan duh vang a ni," a ti a; Mizo hnam a boral loh nan Mizo ngei nupui pasala nei turin Mizo ṭhalaite a chah.

Intihsiak khârna inkhawmah hian D3 Business Enterprise chief executive officer Dr Lalmalsawma Nghaka'n thu a sawi bawk.