Children's Films Exhibition buatsaih dan tur an sawiho

Champhai bawrhsap James Lalrinchhana kaihhruaiin nimin khan Champhai district-a veng/khua 67 tuam chhuaka Children's Films Exhibition kalpui dan tur sawiho a ni.

Bawrhsap chuan, Children's Films Exhibition chu Ministry of Information & Broadcasting hnuaia hmarchhak state pasariha kalpui tur a nih thu a sawi a, "Mizoramah Champhai district thlan a ni hi a lawmawm. Hei hian naupangte ṭhan len leh nun kawng zawh zelna turah zirtirna pein, rah ṭha a chhuah ngei ka beisei," a ti.

Champhai district-a Children's Films Exhibition buatsaih nan sorkar laipui Ministry of Information and Broadcasting-in Rs 14,00,000 a ruahman a; Champhai district khua/veng 67-a branch YMA-te ruahmanna hnuaiah thawh lia kalpui tum niin, ni 55 chhunga zawh hman tura ruahman a ni. Film title 10 a awm a, chu'ng zinga pariat chu Mizo ṭawnga lehlin a ni.