FOCUS, Khawzawl hnuaiah nuai 534.25 man thar chhuak

Khawzawl District Level Coordination Committee for FOCUS chu nimin khan an chairman K Lalrohlua, bawrhsap kaihhruaiin DC conference hall-ah an ṭhukhawm. Kum 2023-24 chhungin Khawzawl district-ah FOCUS enkawl kut hnathawktute'n thlai chi hrang 11 an thar aṭangin cheng nuai 534.25 an la lut tih tarlan a ni.

FOCUS district project manager Vanlalruata, DAO tarlan danin, April 2023 - March 2024 chhungin Khawzawl district-ah FOCUS enkawl kut hnathawktute thlai chi hrang 11 an thar aṭangin Rs 5,34,25,540 an la lut a; FOCUS-DMU Khawzawlin kut hnathawktute enkawl nan cheng nuai 592.62 an hmang thung.

Kum 2023-24 chhung vekin Agriculture, Horticulture, Soil & Water COnservation leh AH&Vety department hnuaiah chhungkua 2,700 chuang ṭanpuina pek an ni a; FOCUS Innovation Fund hmangin Tualte Tomato Processing Plant leh Sialhawk Pineapple Processing Plant din tawh a ni.

Khawzawl Bawrhsap chuan, FOCUS hnuaia thawktute chu an hnuaia hamṭhatnate zau zawka sem rual a, kut hnathawktute ṭha taka dawngsawng ṭhin turin a chah.