Ui khuahkhirhna thupek chhuah

Lawngtlai district magis­trate Cheemala Siva Gopal Reddy chuan June 5, Nilaini khan thupek chhuahin, Lawngtlai district-ah ui khuahkhirh a nih thu a puang a; "Ui vulhtute'n an ui vulhte zun leh êk khawlaiah an hnut­chhiah tur a ni lo," a ti.

Lawngtlai DC chuan, tunlaiin Lawngtlai khaw­puiah ui khuahkhirh loh a tam thu tarlangin, ui khuahkhirh lohin mipui nunphung a tikhaihlak thu leh harsatna nasa tak a siam thu te, ui seh report thlenga dawn a nih thu te, Lawngtlai khawpui a thianghlim a, mipui an him zawk nan leh hrisel zawk nan thupek chhuah a nih thu a tarlang.

LAWNGTLAIA UI KHUAHKHIRHNA

• Ui vulhtute'n an ui vulh an khuahkhirh tlat tur a ni.

• Mi tu mahin khawlaiah ui an chhuah tur a ni lo.

• Ui an chhuah a nih pawhin a neitute'n hrui (chain)-a thlungin an kai tur a ni.

• Khawlaia ui tla leh a nghawnga chain-a thlunna awm lote chu a neitu awm lo anga ngaih a ni ang.

• Ui vulhtute'n an ui vulhte zun leh êk khawlaiah an hnutchhiah tur a ni lo.