Inthlan lehah chuan Congress kan chak ngei dawn tih a chiang - Thanzara

Mizoram Pradesh Congress Committee (MPCC) president Lal Thanzara chuan, Lok Sabha inthlanpui zawh tâkah Congress-in an beisei ang hmu lo mah se, lawmna tur tam tak an neih thu leh, inthlan lehah chuan Congress an chak ngei dawn tih a chian thu a sawi.

Lal Thanzara hian nimina Congress Bhavan-a political session-ah thu sawiin, "Tun ṭum MP inthlanah khan kan beisei ang hmu lo mah ila, Congress-in lawmna tur tam tak kan nei. Auhla ṭha tak, ‘Kan ram, kan hnam, kan sakhua himna’ kan nei. Kan auhla hi party dang BJP thawhpuitute'n aupui ve mah se, ram leh hnam, sakhua himna tider­­thâwngtu BJP thawh­puitu an ni," a ti.

Central-ah Congress party leh INDI Alliance-a an thawpuite'n result ṭha tak an nei nia sawiin, "Sorkar pha lo mah ila kan chak lohna a tlem hle a, kan hmabak a êng hle. Inthlan leh pekah hian Lok Sabha-ah Congress kan chak leh ngei dawn a ni tih a chiang hle a ni," a ti a; India ramah Congress party an ral tawh angin mi ṭhenkhatin sawi ṭhin mah se, Congress party an tho leh mek niin a sawi.

Congress party president Lal Thanzara chuan, Mizoram police mi 1,047-in vote an thlâk thei lo chu pawi an tih thu sawiin, vote an thlak theih loh chhanah sorkar laiin mawh an phura an ngaih thu a sawi bawk.

Lok Sabha inthlan zawh taka Congress partu candidate Lalbiakzama pawhin thu sawiin, "MP inthlan result a lo chhuak a, India ram hi a lawm a, BJP-in thuneihna pumhlûm an chang ta lo hi India tan a lawmawm a ni," a ti.

Lalbiakzama chuan, Lok Sabha inthlana an party auhla chu auhla dik a nia sawiin, "Mizo mipui hian kan la ngaihtuah chiang tâwk lo niin ka hria. A taka kan intawn harh hunah chauh em ni kan harh dawn?" a ti a; inthlan lai vela amah puitute zawng zawng chungah a lawm thu a sawi.