Pathianin min thukru - Zoramthanga

MNF president Zoramthanga chuan nimin khan Mizo Hnam Rûna inkhawmah thu a sawi a; MNF chu Pathianin a thukru rih tih sawiin, inthlana an chak loh avanga inpuhmawhna zawng lo turin an party mite a chah.

Zoramthanga chuan MP thlan chungchang sawiin, "Pathianin min thukru rih a, inpuhmawhna zawng loa Pathian remruata pawm a, Pathianin eng nge min hrilh a, min zirtir a tum tih kan chhût zawk tur a ni," a ti.

ZPM party chungchang sawiin Zoram­thanga chuan, "Tun MP inthlana vote tla a ṭhat theihna tura mipui zirtir nan sorkarin cheng nuai 58 chuang a séng a, chutih laiin, police sang chuang vote thlak thei loa siam an ni leh si hi a vanduaithlak hle a ni," a ti a; state pawna duty police-te'n vote an thlak theih loh chhan chu sorkar inthlahdah vang liau liau niin a sawi.

MNF President chuan, AMC by-election neih tura an candidate tur Search Committee-in uluk taka an zawn hnuah candidate ṭha tak an nei tih a sawi a, "MNF party hi Pathian leh kan ram tan titu kan nih angin Pathianin kum 63 min lo hruai tawh a, min la hruai zel dawn a, ṭul a tih leh kan tling leh ang a, ṭul a tih loh leh kan tla mai ang," a ti.

MNF senior vice president Dr R Lalthangliana chuan, AMC by-election atan candidate ṭha tak an nei tih sawiin, "Kan corporator-te leh MNF General Headquarter lam pawhin theihtawp kan chhuahpui dawn a ni," a ti a; MP inthlanah eptu party-te n mal ṭheuha an ding chungin MNF leh Congress vote hmuh belhkhawmin vote 30,000 chuangin ZPM candidate vote hmuh a khûm niin a sawi.

Inkhawmah hian AMC Ward-XIX by-election-a an candidate tur Dr Lalrinzuali Hrahsel pawhin thu a sawi a ni.