Ramngaw humhalh ṭha ber Reiek

Mizoram Environment & Forest Consultative Forum (MEFCOF) chuan nimin khan IPR Auditorium-ah General Assembly an hmang a, Environment, Forest & Climate Change (EFCC) minister Lalthansanga'n a hmanpui. MEFCOF chuan ramngaw leh nungcha humhalh ṭha berah Reiek khua an thlang.

Minister Lalthansanga chuan, ram leh mipui nun khawchhuahna atan leh hmasawn zelna atan ramngaw leh nungcha humhalh a pawimawh thu sawiin, "MEFCOF-in hun rei tak aṭanga rim tak leh mahni sum sénga ramngaw humhalhna in buatsaih hi in fakawm tak zet. Ram tana ro hlu in chher chhuak a ni," a ti a; theihtawp chhuah zui zel tur leh sorkar nena thawhhona ṭha nei turin a chah.

Inkhawmah hian MEFCOF hmalaknaa ramngaw leh nungcha humhalhna hmun (ram reserve) Zotheihuan 170 awm tawh zingah enkawl ṭha khaw pasarih leh Mizo environmentalist zinga entawn tlak mi pali hnenah chawimawi a hlan a ni.

MEFCOF inkhawmpuiah hian district hrang hranga sub-headquarters leh environmental pawl hrang hrang aiawhte an tel a, kum 2024-2026 chhunga MEFCOF hruaitu tur an thlang nghal a ni.