Lawngtlai dist-ah raltlan 7,794 awm

Lawngtlai District Level Committee on Border Pro­tec­tion Grid chu an chairman Cheemala Siva Gopal Reddy, DC hoin nimin khan a pisaah an ṭhukhawm. Lawngtlai district-ah Myanmar leh Bangladesh aṭangin raltlan 7,794 an awm mek thu tarlan a ni.

Ṭhutkhawma tarlan danin, Lawngtlai DC office chuan Lawngtlai district-ah Myanmar raltlan mi 5,922 leh Bangladesh raltlan mi 1,872 a chhinchhiah mek a, an vaiin mi 7,794 an ni. Raltlan mi 7,794 zinga 2,806 chu kum 18 hnuai lam an ni.

Lawngtlai district-a Myanmar raltlan lut hnu­hnung berte chu April 25, 2024 khan Hruaite­zawlah an lut a, Myanmar raltlan mi 5,922 awm mekin, mipa puitling 1,860, hmeichhe puitling 2,049 leh kum 18 hnuai lam 2,013 an ni a, relief camp 38 leh khaw hrang hrang 55-ah an awm.

Bangladesh aṭanga raltlan Lawngtlai district-ah mi 1,872 an awm mek a, mipa puitling 580, hmeichhe puitling 499 leh kum 18 hnuai lam 793 an ni a; relief camp 12 leh khaw 11-ah an awm. Bangladesh aṭanga raltlan lut chhinchhiah hnuhnun ber chu June 3, 2024-a Chamdur P-I khuaa lutte an ni.

Lawngtlai district-a raltlan awm mekte chu kum 2021-ah an lut ṭan a; sorkar leh tlawmngai pawl hrang hrang aṭanga ṭanpuina lut hmangin chhawmdawlna kalpui a ni ṭhin.

DC hoa ṭhutkhawmah hian, Health department-in raltlante tan a thlawna inentirna, damdawi sem, hri danna pek leh thosi lên semte an kalpui tawh thu te, tun hnaiah Chamdur-P leh Vaṭhuampuiahte free clinic buatsaih leh turin rua­hmanna kalpui mek a nih thu an tarlang. DCSO office-in fûr tla tur buhfai an chhêk mek rualin raltlante buhfai pek tur kêp thei tura hmalak dan ngaihtuah ni se, an ti.