Police-in kuhva leh heroin man

Mizoram police-te chuan June 6, Ningani zing khan East Lungdar khaw daiah Thangtinkapa, Leisenzo khalh truck MZ-04 A-4629 leh T Chhuanliana, Sesih khalh truck MZ-04 A-6453 aṭangin Myanmar aṭanga dan loa lak luh nia hriat kuhva dah ip 150 (kg. 7,500) an man.

June 6 vek khan police-te'n Champhai Khankâwn Chalbawia Junction-ah heroin kg. 1.902 (hawng 156) an man a, Rs 57,06,000 hû a ni. Heroin phurhna lirthei i-10 car MZ-01 L-4077, Lalnunpuia (42) s/o K Lalhlira, Zokhawthar, Aizawl Hunthar Venga khawsa mek nia inchhak an man.

Lunglei police-te pawhin June 5, 2024 zan khan Lunglei Venglaiah Francis Lalramthanga (42) s/o ZD Lalthlamuana, Lunglei Bazar Veng nia inchhál hnen aṭangin heroin gram 116 (hawng 10) an man bawk a, Rs 3,48,060 hû a ni. Heroin mana vangte lakah hian NDPS Act tlawhchhanin thubuai ziah luh a ni.