KHAWTHLIR

Doctor 32 la thar

Mizoram sorkar chuan doctor post ruak hnawhkhahna leh indaih lohna phuhrûk nan June 6, 2024 khan National Health Mission (NHM) hnuaiah doctor 32 a la thar. Thu dawn danin, doctor lak tharte chu June 5, 2024-a ZMC aṭanga chhuak (graduate) tharte an ni a, June 18-28, 2024 chhungin orientation training neihpui an ni ang.

MLA-in tui dah vawhna vailiam

Aizawl West-I bialtu MLA TBC Lalvenchhunga chuan a bial chhung hmun hrang hranga dah tur tui dah vawhna khâwl (water cooler) 33 an dawn chu nimin khan Chief Minister's Office kawt aṭangin a vailiam. Water cooler-te hi BS Enterprise-in corporate social responsibility hmanga an pek a ni a, Aizawl West-I biala sikul 32 leh Chhangurkawn taxi stand-a dah tur a ni.

MHIP an lawm

MHIP Gen.Hqrs chuan thuchhuah siamin, tun hnaia Cyclone Remal vanga Mizoram hmun hrang hranga chhiatna nasa tak thleng chu pawi an tih thu an tarlang a, "Melthum leh Hlimen lei tawlh vanga chhiatna thleng leh thi eng emaw zat an awm avangin hrehawm kan tiin pawi kan ti a, an tan kan ṭawngṭai a ni," an ti. MHIP chuan, ruang zawnnaa thawk chhuak te, ei tur, damdawi leh ṭul dangte thawh chhuahpuitu Assam Rifles-te leh ṭanpuina petute chungah an lawm thu an sawi.

CYMA Hall hawng

Central YMA Hall chei ṭhat chu nimin khan CYMA president Lalhmachhuana'n a hawng. Hall cheina atan hian SASCI aṭanga sum hmuh Rs 34,97,004 sên a ni. CYMA chuan hall hman hawh man a bithliah thar nghal a, hman dan leh a hun azirin Rs 3,500 aṭanga Rs 7,500 a ni.

Beer leh soju man

Assam Rifles leh CID (Crime) hnuaia Special Narcotics mite chuan nimin khan Zemabawka Aizawl-Lunglei kawng ṭawngṭaina mualah ram dang beer báwm 89 leh soju an man a, a neitua puh mi pathum an man bawk. An thil mante hi Rs 7,39,000 hû a ni.