Sports Conclave-a kal tur an tam; Central aṭangin sum dawn a ni
Sports & Youth Service (SYS) department chuan June 13-14, 2024 chhungin sorkar laipui aṭanga sum hmuh hmangin Baptist Centre, Falkland Vengah Mizoram Sports Conclave - Preparing Mizoram for Olympic Games, 2036 an buatsaih dawn.
Mizoram Sports Conclave buatsaih tur chungchang hi SYS minister Lalnghinglova Hmar chuan June 8, Inrinni khan a pisaah thuthar thehdarhtute kawmin a sawifiah a, "Conclave hi national level sport intawhkhawmna niin, Olympic 2036-a Mizo infiammi tam thei ang berin Olympic medal an awrh theihna tura inbuatsaihna hmasa a ni. Mizoram-a national level sports conclave hmasa ber tur a ni a, India ram state zingah Mizoram hi Olympic 2036 vision nei a, national level sports conclave buatsaih hmasa ber kan ni," a ti.
Olympic 2036 thlen tumin India a inbuatsaih tih sawiin Minister chuan, "October 14, 2023-a International Olympic Committee (IOC) session-ah prime minister Narendra Modi chuan India-in Olympic 2036 thlen a tum thu a sawi," a ti a, India-in Olympic thleng thei khawpa ṭha infiamna hmunhma leh bungrua a neih theih tur thu a sawi.
Lalnghinglova Hmar chuan, Olympic-a hlawhtling turin ruhrel ṭha ringawt a tawk lo tih sawiin, "Infrastructure leh facility ṭha tak taka inel tur infiammi ṭha kan neih a ngai. Tun aṭangin infiammite hmasawnna (athlete development) ngaihtuah a, hmalak nghal char char a ṭul tawh. Hei hi hriain central sorkar dawrin theihtawp kan chhuah a ni," a ti.
SYS Minister sawi danin, Ministry of Youth Affairs & Sports hnuaia Department of Sports chuan Mizoram Sports Conclave – Preparing Mizoram for Olympic Games, 2036’ buatsaihna atan February 27, 2024 khan Scheme of Human Resources Development in Sports (HRDS) hnuaiah Rs 68,80,500 a pe a ni.
Mizoram Sports Conclave-ah hian Assam, Manipur leh Meghalaya sports minister te, SAI Director General leh hotu dang te, Indian Olympic Association CEO, Ministry of Youth Affairs and Sports Secretary leh Services Sports Control Board secretary te, Tata Trusts, Reliance Foundation Sports, Tata Steel leh Inspire Institute of Sports etc.-te tel ngei tura beisei an ni.
Olympic Games-a medal lak theihna tura inbuatsaihna a nih angin Conclave-ah hian medal lak beiseiawmna deuh sport discipline-te thlur bing a ni ang a, infiammite hmasawnna ngaih pawimawh ber a ni dawn.
Sorkar, private sector, sports federation/association leh khawtlang anga mawhphurhnate zirho a ni dawn a, hmalak dan tur ruahmanna siam nghal zel a ni ang.
Mizoram Sports Conclave pual hian website https://mizoramsportsconclave.... siam a ni a, website-ah hian Conclave-a tel duhte chu inziah luh theih a ni.