Card vár tana buhfai man tihsan Council of Minister-ah thlen a ni

Food, Civil Supplies & Consumer Affairs (FCSCA) department chuan card var bik tana ration buhfai man tih­sàn chungchang chu Council of Minister (CoM) ngaihtuah turin an thlen a, mahse, June 6, 2024-a CoM ṭhut­­khawmah ngaih­tuah hman a ni lo.

Vanglaini palai zawhna chhangin FCSCA minister B Lalchhanzova chuan, buhfai man tihto chu Council of Minister ngaihtuah ngai chi a nih angin an thlen tih a sawi a, "June 6-a kan ṭhut­khawm­naah agenda a tam deuh avangin ngaihtuah hman loh zingah a tel. CoM-in kan rawtnate min pawmpui chuan a rang thei ang berin ration card var bik tan buhfai man tihsan a ni ang," a ti.

B Lalchhanzova chuan, card eng nei chhungkuate chuan thla khatah a thlâwnin buhfai kg. 35 an dawn thu sawiin, "Card pâwl neite chuan mi pakhatin thla khatah kg. 5 a thlâwna an dawn bakah, kg. 3 zel Rs 15-in an lei thei. Card var neite chuan mi pakhat tan Rs 15-in kg. 8 an lei thei," a ti a, state dangah card var tan sorkarin subsidy a pek ve loh thu a sawi.

FCSCA Minister chuan, card var tan sorkar­­in kg. khatah subsi­dy Rs 25 vel a pek thu sawiin, "Hei vang hian sorkarin buhfai manah a chàwi belh nasa. Rua­hman­na kan siam dan chuan, card var bik hian Rs 30-in kg. 1 khul tawh se kan ti a, chutichung chuan sorkarin Rs 9 a la tumsak dawn tho. Card var subsidy nan hian kum khatah cheng vbc. 91 vel sèn a ni. Card eng leh card pawl chu a ngai angin a kal ang," a ti.

Ration card var nei, card pawl leh card eng nei àwma inngaite tan inhriattir hun a awm thu sawiin Minister chuan, "Chhungkaw 4,000 vel an inhriattir. Hun khâr hnua rawn in report tum eng emaw zat an awm bawk," a ti a, ruahmanna fel tak siamin ration card la ennawn leh tur a nih thu a sawi.

Supply Minister chuan, mipuiin retailer dawra e-PoS an hmeh loh avangin thla thara an quota tur a bo phah dawn lo tih a sawi nawn a; ration buhfai an lak dawn loh chuan e-PoS hmet kher lo turin mipui a chah a ni.