KHAWTHLIR

Thisen pe

June 8, Inrinni khan PYD (NEI) Durtlang chuan Synod Hospital blood bank-ah thisen unit 13 an pe a, petute mipa pakua leh hmeichhia pariat an ni. ṬKP, Lunglei Venglai unit-in an kohhran hall-ah Lunglei Civil Hospital tan thisen unit 56 an pe a, petute mipa 37 leh hmeichhia 19 an ni a; Siahaa ECM KTP-te pawhin District Hospital tan unit 27 an pe a, petute mipa 22 leh hmeichhia panga an ni. June 7, 2024 khan KṬP, Champhai Zotlang North Branch-in unit 44 leh KṬP, Chhipphir Bial hmingin Zote South khuaah unit 11 pek a ni bawk.

Lehkhabu tlangzarh

V Lalremthanga, IAS (Rtd) ziah 'Ka thlirna tlang aṭangin' tih lehkhabu chu June 8, Inrinni khan PC Lawmkunga, IAS (Rtd)-in Tourist Lodge, Chaltlang conference hall-ah a tlangzarh.

Officer’s council

Salvation Army-a Central South Division huam chhunga officer-te chuan June 7-9, 2024 khan Gilgal Corps, Nursery Vengah rorel inkhawmpui, Division Officer’s Council an nei a; Central South Division chhunga CO bial 36 aṭangin officer 70 an tel. Zirtawpni leh Inrinni khan rawngbawlna report leh hmalak zel dan turte sawiho a ni.

Minister-in hlan

PWD minister Vanlalhlana chuan March 8, Inrinni khan PWD Khawzawl Division chhung, New Chalrang khuaa lemin hlauhawmna hmun a tlawh a, tarpauline 40, thirzai kg. 25 leh pliers a hlan. Leimin hlauhawmna hmun hi PMGSY-II scheme hnuaia Khawzawl-Biate kawng laih vanga min hlauhawm a ni.

Varhva lei hawng

Tuichang bialtu MLA W Chhuanawma chuan June 8, Inrinni khan Tlangpui leh Khaw­lailung inkalpawhna tur Varhva luia lei (bridge) dawh thar a hawng. Lei hi ft. 9-a zau, ft. 10-a sang a ni a, a ban leh ban inkar tehin ft. 29-a thui a ni. Lei siam nan Rs 5,80,000 an hmang.

Minister-in hmanpui

Mizoram Civil Pensioners Association, Ramhlun North Branch chuan June 8, Inrinni khan Ramhlun Indoor Stadium-ah silver jubilee an lawm a, bialtu MLA Dr Vanlalthlana, minister-in hmanpuiin, jubilee souvenir a tlangzarh.