Vaivakawnin ruihhlo do beihpui hawng; Theihtawp ka chhuah dawn - Excise Minister

Vaivakawn khawtlang chuan June 8, Inrinni khan Sairang-Hunthar Veng kawngah ruihhlo do beihpui hawn inkhawm an buatsaih a, bialtu MLA leh Excise & Narcotics minister Lalnghinglova Hmar-in hmanpuiin, theih­tawp a chhuahpui dawn thu a sawi.

Ruihhlo do beihpui hawn inkhawm hi Vaiva­kawn Branch YMA secretary Lanṭan­puia'n a kaihruai a; Excise Minister chuan, ruihhlo do beihpui an thlak turah Vaiva­kawn khawtlang hruaitute nen ṭum thum an inkawm thu sawiin, "Mu mang lo, mahni inseng so leh mi huat hlawhin zu leh ruihhlo an lo do tawh ṭhin. Thâ thlah a nih hnuah an rawn inlár leh ṭhin. Tun ṭuma ruihhlo do beihpui an thlâk leh tur pawh an huphurh a, an hriatthiam awm," a ti.

Lalnghinglova chuan, Vaivakawn khaw­tlang mipui kal khawmin zu leh ruihhlo fihlimna veng ni tura thutlukna an siam chu ropui a tih thu sawiin, "Sorkar chuan 100%-in kan thlawp. Khawtlang nena thawhho loh chuan thawktu indaih lohna avangtein sorkar ringawt chu a chak tâwk lo. Sorkar anga tih theih a awm chuan theihtawp kan chhuah dawn," a ti a, mimal ang pawha theihtawp a chhuah dawn thu a sawi.

Vaivakawn mipuiin zu leh ruihhlo hmunpui nih an duh tawh lo tih sawiin Minister chuan, "Vaivakawn huam chhunga zu leh ruihhlo ti ṭhinte hi an veng mi an awm mang loin a rinawm. Veng mi nghet ni lo, zu leh ruihhlo zuar tura mi in luahte an ni. Phur thuta ruihhlo do beihpui hi thlak chi a ni loa, ṭan mar pat a ngai dawn. Khawtlang ṭangrualin in hneh ngei ang," a ti.

Lalnghinglova Hmar chuan, zu leh ruihhlo do kaihhnawihah darkar 24 chhung biak theih reng a nih thu sawiin, a lo lak loh pawhin a hman veleh a lo call let tur thu Vaivakawn khawtlang hruaitute a hrilh.

Vaivakawn local council chairman ZR Zo­than­mawia chuan, an thil tih chu an khaw­tlang mai bakah, ram tan pawh chhin­chhiah tlak a nih tur thu sawiin, "A chhan chu Vaivakawn huam chhung hi hun eng emaw chen aṭang khan zu leh ruihhlo chi hrang hrang zuar leh ti ṭhinte fuan khawmna a ni. Mizoramin mikhual kan neih apiangte paltlang reng kan ni a, ram hmel timawi lo theite fuan khawmna a ni ta. A zahthlak," a ti.

Vaivakawn LC Chairman chuan, zu leh ruihhlo zuarte chu Vaivakawn an la ni ve zel duh a nih chuan eizawnna thlak nghal turin a chah a, "Zu leh ruihhlo zuar tura Vaivakawn rawn pan ṭhinte min rawn chîm buai tawh lo turin kan hrilh a che u. Ruihhlo ti ṭhinte pawhin ruihhlo ti turin kan veng rawn pan tawh suh u," a ti a; in neitute pawh zu leh ruihhlo zawrhna atana an inte luahtir tawh lo tura hriattir an nih thu a sawi.

Inkhawmah hian Excise Minister chuan Vaivakawnin ruihhlo do beihpui an thlakna atana an hman atan Rs 20,000 a hlan a, Excise commissioner Z Lalhmangaiha hoin department-a thawk eng emaw zat an tel a ni.