Mount Mawma Ecological Park hawng

Tourism minister Lalrinpuii chuan, Siaha district-a tlang sang ber, Mawma tlanga 'Mount Mawma Ecological Park' siam thar chu June 8, Inrinni khan Chakhei khuaah a hawng.

Mount Mawma Ecological Park hi North Eastern Council (NEC) aṭanga hmuh cheng nuai 236.17 senga siam niin, contractor chu M&M Construction & Consultancy, Ramhlun Vengthar a ni a; April 1, 2023-ah hna thawh ṭan niin, February 5, 2024 khan zawh a ni.

Mount Mawma Ecological Park-ah hian Mawma tlang chhip thlengin trekking/hiking route siam niin, cubic lung hmangin step siam a ni a; chawlh hahdamna tur (waiting/rest shed) pathum siam a ni. Suspension bridge, camping ground panga, khaw thlirna (watch tower), wildlife enclosure atan sava lên 128 leh dil (artificial pond) pakhat siam a ni bawk.

Minister Lalrinpuii chuan, Tourism department-in hmachhawp tam tak a neih thu sawiin, "Mizoram páwn lam aṭanga khualzin tam zawk hîp tum mek a ni. Mount Mawma Ecological Park pawh hian tlawhtu tam tak neih belh zelin, Chakhei mipuite'n hlâwkna tam zawk an nei dawn a ni," a ti a, Park chu neitu thinlung púa enkawl turin Chakhei khaw mipui a chah.