Sorkar sikulah zirtirtu pakhatin zirlai 21.33 an enkawl zel ang a ni
School Education department hnuaia academic session kal mek 2024-25 ah sikul 1,553-ah zirlai 78,529 leh zirtirtu 3,681 an awm a, zirtirtu pakhatin zirlai 21.33 zel an enkawl ang a ni.
RTI Act tlawhchhana kum 2024-25 dinhmun zawhna School Education department SPIO-in a chhan danin, School Education department hnuaiah primary school 791, middle school 564 leh high school 198 a awm. P/S 791-ah zirtirtu 1,278 leh zirlai 40,615 an awm a, M/S 564-ah zirtirtu 1,459 leh zirlai 25,828 awmin, H/S 198-ah zirtirtu 944 leh zirlai 12,086 an awm.
Sorkar primary, middle leh high school awm zat chu 1,553 a ni a, chu'ngah chuan zirtirtu 3,681-in zirlai 78,529 enkawlin, chawhrualin zirtirtu pakhatin zirlai 21.33 ṭheuh an enkawl ang a ni.
Primary school bikah chawhruala sikul pakhata zirtirtu awm tam berna leh zirtirtu pakhatin zirlai a enkawl zat tlemna ber chu Aizawl district a ni a, P/S 219 a awm. Zirtirtu 522 leh zirlai 12,037 an awm a, sikul pakhatah zirtirtu 2.38 zel awm ang a ni a, zirtirtu pakhatin zirlai 23.06 zel enkawl ang a ni bawk.
Mamit district chu primary school bikah chawhruala sikul pakhata zirtirtu awm tlemna ber leh zirtirtu pakhatin zirlai a enkawl zat tamna ber a ni. P/S 79-ah zirtirtu 61 leh zirlai 4,499 an awm a, sikul pakhatah zirtirtu 0.77 zel awm ang niin, zirtirtu pakhatin zirlai 73.75 zel an enkawl ang a ni.
Aizawl district chu middle school-ah pawh chawhruala sikul pakhata zirtirtu awm tamna ber leh zirtirtu pakhatin zirlai a enkawl zat tlemna ber a ni a; M/S 144-ah zirtirtu 589 leh zirlai 6,863 awmin, sikul pakhatah zirtirtu 4.09 zel awm ang leh, zirtirtu pakhatin zirlai 11.65 zel enkawl ang a ni.
High school-ah pawh Aizawl district chu chawhruala sikul pakhata zirtirtu awm tamna ber leh zirtirtu pakhatin zirlai a enkawl zat tlem berna a ni. Aizawl district-a H/S 56-ah zirtirtu 433 leh zirlai 4,463 an awm a, sikul pakhatah zirtirtu 7.73 zel awm ang a ni a, zirtirtu pakhatin zirlai 10.31 zel enkawl ang a ni bawk.
Mamit district chu high school-ah chawhruala sikul pakhata zirtirtu awm tlemna ber a ni a, H/S 15-ah zirtirtu 41 awmin, sikul pakhatah zirtirtu 2.73 zel awm ang a ni.
Chawhrualin H/S-a zirtirtu pakhatin zirlai a enkawl tamna ber Champhai district-ah chuan H/S 16-ah zirtirtu 50 leh zirlai 1,115 an awm a; zirtirtu pakhatin zirlai 22.30 zel enkawl ang a ni.
Siaha leh Lawngtlai district-ah chuan primary school bik chu autonomous district council hnuaia awm a nih avangin Mizoram School Education department-in an data a nei lo a; table-ah pawh Siaha leh Lawngtlai district bika P/S dinhmun tarlan tel a ni lo.