Minister leh Lunglei YMA-te inkâwm

Minister Lalrinpuii chuan nimin khan an inah YMA Sub-Hqrs, Lunglei hruaitute a kawm a; kumin October thlaah Lungleiah Music Festival buatsaih tum a nih thu a sawi.

Minister hnenah hian YMA Sub-Hqrs hruaitute chuan March 22, 2024-a YMA Sub-Hqrs, Lunglei rorel inkhawma rorelte an thlen a, bawhzuisak turin an ngen a ni.

Lalrinpuii chuan, YMA Sub-Hqrs hruaitute thu thlente chu MLA dangte nen theihtawp chhuaha an bawhzui tur thu a sawi a, "Kumin October thlaah hla phuah lama hma kan sawn theih nan Lungleiah music festival buatsaih a ni dawn a, Lunglei Civil Hospital tih­chang­tlun nan specialist dah leh ICU hman theih tura hma­lak bakah, health care lam chak taka hmalak a ni ang," a ti.

Lunglei YMA hruaitute hian Lunglei khawpui zauhna atana Lunglei chhuah lama kawng siam tura hmalak te, Mualṭhuam North YMA Park-ah project lian tham deuha hmalak te, Pukpuia YMA ramah youth hostel sak dan ngaituah te, Kawrpui leh Khawthlangtuipui, Khojoisuri leh Malsori khua inkar chu buh leh bâl thar nan ram ṭha a nih thu leh Mizo chhawr theih turin sorkarin cheibawl se an duh thute an thlen.

Lunglei College-ah home science zirna dah tur te, hall lian ṭha siam leh Aizawl-Thenzawl-Lunglei kawnga Lunglei district bik tih­hmasawn chungchangahte hma la turin an ngen bawk.

Minister Lalrinpuii hi Lunglei South bialtu MLA Lalramliana Papuia'n a ṭawiawm a ni.