Library tihchhiat Art & Culture-in pawiti
Art & Culture department chuan thuchhuah siamin, June 1, 2024 zana YMA, Melthum Branch Library tihchhiat a ni chu pawi an tih thu an tarlang.
Art & Culture department chuan, Melthum YMA Library chu kum 1998-99 khan Art & Culture department-in a pawm (recognise) tih a tarlang a, "Kum 2007-ah central sorkar (RRRLF building grant) leh state sorkar sum hmangin sak a ni a, state sorkar sum leh central sorkar ṭanpuina aṭangin bungraw hrang hrang leh lehkhabu 3,000 vel pek a ni," a ti.
June 1, 2024 zana state budget leh central sorkar sum hmanga sak Melthum YMA Library building tihchhiat leh suasam a ni chu pawi an tih thu tarlangin Art & Culture chuan, "Mizo leh Mizo, veng leh veng inkarah kan department kaltlanga hmasawnna atan hmalakna tichhe zawnga thil thleng kha pawi kan ti a, hetiang hi tun hnuah chuan thleng tawh lo se kan duh," an ti. Thil thlen dan police-te'n an zir chian mek thu an tarlang bawk.