Lok Sabha inthlana inhneh tawh dan

Mizorama Lok Sabha inthlanna neih tawhah kumin 2024-a inthlan kha thlan tlin takin amah hnaih bertu a hnehna a san lamah pathumna a ni.

Lok Sabha General Election 2024-ah hian thlan tlin tâk Richard Vanlalhmangaiha, ZPM candidate chuan amah hnaih bertu MNF candidate K Vanlalvena chu vote 68,288-in a hneh a, Mizorama Lok Sabha inthlan awm tawhah inhnehna san lamah pathumna a ni.

MP atana thlan tlin takin amah hnaih bertu a hneh nasat ber ṭum chu kum 2009 inthlanah khan a ni a, Congress party candidate CL Ruala chuan eptu party-te ṭangrualin candidate an vawrh chhuah Dr H Lallungmuana chu vote 1,08,955-in a hneh. Hemi kuma inthlanah hian CL Ruala vote hmuh zat chu vote thla zat aṭangin 65.58% tlingin, candidate mal vote share tam ber ṭum a ni bawk.

Lok Sabha inthlana inhnehna nasat ber dawttu chu kum 1999 inthlanpui kha a ni a; MNF thlâwp independent candidate Vanlal­zawma'n Congress party leh party dangte thlâwp independent candidate Rokamlova chu vote 68,659-in a hneh a ni.

Hetih lai hian, inhnehna tlem ber ṭum chu kum 1998 kha a ni. Mizoram CEO website-a tarlan danin, kum 1998 inthlanpuiah hian thlan tlin tâk Citizens Common Front (inde­pendent) candidate Dr H Lallung­muana'n vote 1,06,552 hmuin, amah hnaih bertu Congress candidate J Lalsangzuala (vote 1,06,511) chu vote 41 chauhin a hneh.

Kum 2019 inthlanpuiah khan thlan tlin tâk C Lalrosanga, MNF candidate-in vote 2,24,286 a hmu a, Congress leh ZPM candidate inṭâwm Lalnghinglova Hmar (vote 2,16,146) chu vote 8,140 chauhin a hneh bawk.