2015-16 aṭanga K Deposit tling khawm cheng vbc. 1,300 kan nei - TBC Venchhunga

ZPM party chuan nimin khan an pisaah chhung inkhawm an hmang a, thu sawitu adviser to chief minister (Finance) TBC Lalvenchhunga, MLA chuan, sumah sorkar a harsat thu leh financial year 2015-16 aṭanga tun thlengin K Deposit-ah sum tling khawm cheng vbc. 1,300 a awm tawh thu a sawi.

TBC Lalvenchhunga chuan, "Sorkar sum harsatzia mi tam takin kan hrethiam lo a, kan leiba chu sawi loh, kum 2015-16 aṭanga K Deposit tling khawm ringawt pawh vbc. 1,300 kan nei. June 2023 hnu lama Central aṭanga sum lo lut, nodal agency leh department-a lut tur pakhat mah dah luh a awm lo. ZPM kan sorkar níah khan Ways & Means Advance cheng vbc. 139 ba sa, Treasury ruakin bul kan ṭan a ni," a ti.

Mizoram sum dinhmun a ṭha lawk thei dawn lo tih sawiin Adviser to CM chuan, "A luhaithlak hle. Kumina kan sum pûk theih chu vbc. 900 a ni a, NABARD aṭang nen a vaia kan pûk theih chu vbc. 1,118 vel a ni. Chuta ṭanga leiba rulh tur kan neih sa chu vbc. 640 zet a ni," a ti a; sorkar inenkawlna ṭha lo avangin cheng vbc. 100 zet hloh a nih thu a sawi.

TBC-a chuan, "Sorkar ṭha loin a hrin chhuah zar ZPM-in kan zo a, mumal leh ṭha takin sorkar lo kal ni se 15th Finance Commission-a kan sum hmuh ve turte kum 2021 khan lo tifel vek chu ni se, tun ang hian kan buai lo ang. Tunah kan sum hmuhna tur kan la thlang leih leih chauh a ni a, kum khat chiah hun awm tawhah hian chêt lakna hun kan nei hman mang dawn lo," a ti.

Lalvenchhunga chuan, thil dik lo ti turin mipuite'n minister leh MLA-te an nawr nasat lutuk a hlauh thu sawiin, "Party worker-te pawh kan insûm a ngai. Mi dik lote thawhpuia inhaivûr hi kan tih ve tur a ni lo a, bul ṭan turin party mipui­te'n hma kan hruai a ngai," a ti a; SACSI sum lapse dan a sawifiah bawk.