KHAWTHLIR

Zotrek office

Zotrek Adventure Club chuan nimin khan an office thar hawnna leh an din champha vawi 12-na an lawm. Zotrek office thar hi David Zohmangaiha, Mount Everester-a lawn chhuak tawhte in, Republic Vengah hawn a ni. Zotrek-ah hian member 150 vel an awm mek.

BJP hruaitute tel

June 9, Pathianni zana New Delhi-a prime minister atana Narendra Modi leh cabinet minister eng emaw zatte lak luhna inkhawmah Mizoram aṭangin BJP president Vanlalhmuaka, MLA pahnih Dr K Beichhua leh K Hrahmo bakah hruaitu dangte an tel.

ASF vanga vawk thi a awm belh zel

African Swine Fever vangin nimin khan Mizoramah vawk 149 a thi a, vawk 44 suat (tihhlum) a ni bawk. AH&Vety department chhinchhiah danin, nimin khan ASF vangin Aizawl district-a khua/veng pariatah vawk 137 a thi a, Kolasib district-a khaw pahnihah vawk pakua leh Serchhip district-a khaw pahnihah vawk pathum a thi bawk. Nimin khan vawk 44 suat a ni a, chu'ngte chu - Aizawl district-a khaw pathum - Darlawngah 18, Thingsul Tlangnuamah pariat leh Thingsulthliahah pahnih te, Serchhip district-a Chhingchhipah 13 leh Baktawngah pathumte a ni.

Award dil theih

India rama civil mite chawimawina sang, padma award hrang hrang dilna hun hawn mek a ni a, September 15, 2024 thleng dilna hun hawn niin, awards.gov.in kaltlangin dil theih a ni. Padma award-te hi - art, literature & education, sports, medicine, social work, science & engineering, public affairs, civil service, trade & industry, etc-a mi chungchuang bikte hnenah hlan ṭhin a ni.

Pass vek lawm

Special Blind School, Durtlang Venglai chuan HSLC exam-a zirlai an neih pathumte an hlawhtlin vek chu nimin khan an hmunah an lawm a, School Education minister Dr Vanlalthlana'n a hmanpui. Special Blind School hi kum 2001-a din a ni a, mi 32 an inzir chhuak tawh a, mi 19-in sorkar hna nghet an thawk tawh.