Kài chhan hre lo hripui vei an pung Health-in fimkhur zual turin mipui chah
Tun hnaia Mizorama Covid-19 vei hmuh chhuah zingah Mizoram chhunga kai chhawng leh kàina chhan hriat theih loh an awm nual a; hei vang hian Health department hotute chuan nunphung pangngai tial tial karah fimkhur lehzual turin mipui an chah.
Sorkar thuchhuaktea a lan danin, tun hnai ni thum - October 10-12 chhunga Mizorama Covid-19 positive hmuh chhuah mi 40 an awm a; October 10-ah mi 18, October 11-ah mi pakua leh October 13-ah mi 13 an ni. Mi 40 zinga mi 17 chu Aizawl tualchhunga kai an ni a, an zinga mi 12 chu an kài chhan hriat theih a ni lo.
Aizawl tualchhunga kai mi 17 bakah hian Mizoram chhunga kái nia hriat, tun hnaia state páwna zin chhuahna nei lo sipai 13 an awm bawk. Ni thum chhunga Mizorama hripui vei hmuh chhuah mi 40 zinga state páwn aṭanga rawn lut thar chu mi 10 chiah an ni.
Tun hnaia hripui vei hmuh chhuah, Aizawl tualchhunga kái nia hriat mi 17 zingah taksaa harsatna nei (Covid-19 symptom lang) an awm nual a; October 12-a hmuh chhuah zingah symptom nei pakhat leh October 11-a hmuh zingah symptom nei panga an awm a, October 10-a hmuh zingah harsatna nei an awm bawk.
Aizawl khawpui lailí leh sumdawnna hmunpui Dawrpui vengah Covid-19 positive mi 16 an awm mek a, Mizoram chhunga kái chhâwng veka ngaih an ni. October 6-ah chhungkaw khat aṭangin hripui vei mi paruk hmuh a ni a, October 8-ah mi pahnih (nupa), October 11-ah mi pasarih leh October 12-ah mi pakhat hmuh chhuah leh a ni. RAT-a positive pakhat chu ZMC-a endik nawnnaah a negative thung.
Health department hotute chuan Vanglaini palaiin a kawmnaah, Mizoramah nunphung a pangngai tial tial avang leh Covid-19 vei enkawlte chhuahtirnaa kaihhruaina a hma aia a nêm deuh tawh avangin mi tin an fimkhur lehzual a ṭul thu an sawi.
Covid-19 chungchanga sorkar thupuangtu chuan, Covid-19 chu natna thar a nih avangin hriat dan leh hmuh dan a inthlak fo tih a sawi a, "Thil chiang fak lo karah kan awm. Tunah hian nunphung pangngaiah kan lêt tial tial a, kan fimkhur em em a ngai a, hei hi a pawimawh ber pakhat a ni," a ti.
Hripui chu mipui vantlanga a darh hun leh a veite pawh an kai chhan hriat theih loh hun a la thleng lo thei loa ngaih a nih thu sawiin Covid-19 Spokeperson chuan, "Hri hi a darh tial tialin a rinawm a, kaina pawh hriat a har telh telhin a rinawm," a ti a; hripui veite chhuahtir leh inkhung hran chungchangah kalphung a khauh loh tial tial avang te, sikul hawn a nih mek avangte leh nunphung a pangngai tial tial avangin mimala fimkhur a ngai lehzual dawn tih a sawi bawk.