Entry Tax lak thla khatnaah Rs. 5,45,745 hmu

Mizoram sorkar chuan April 2016 aṭangin Mizorama chhiah thar Entry Tax a la ṭan a, Entry Tax aṭang hian Taxation department chuan April 2016 chhung khan chhiah Rs. 5,45,745 an hmu.

Taxation department tarlan danin, Taxation department-in April 2016 chhung khan Entry Tax aṭangin Rs. 5,45,745 an hmuh bakah, Profession Tax aṭangin Rs. 47,05,254, Sales Tax aṭangin Rs. 34,62,71,558 leh Entertainment Tax aṭangin Rs. 5,30,151 an hmu a; April 2016 chhunga chhiah an hmuh zawng zawng chu Rs. 35,20,52,708 a ni.

The Mizoram Entry Tax Rules, 2015 chu Cabinet-in kum 2015-a a pawm hnuah Mizoram Legislative Assembly pawhin a pawm tawh a; chumi ang chuan April 2016 aṭangin Entry Tax lak ṭan a ni.

Taxation department aṭang thu dawn danin, The Mizoram Entry Tax Rules chu Mizoram chhunga bungraw lak luh ṭhin, chhiah lak ngai lohnate aṭanga chhiah lakna tur a ni a; kum khat chhungin cheng nuai 300 vel hmuh theih beisei a ni.

Ruahmannaah chuan, internet online shopping aṭanga Mizorama bung-raw lutte aṭangin Entry Tax lak tum a ni a, mahse, tunah chuan online shopping
aṭangin chhiah lak a la ni rih lo.

The Mizoram Entry Tax Rules hmang hian department, contractor leh mimalin bungrua an lak luh, tihral tur ni kher lo aṭang pawhin Entry Tax lak a ni. Entry tax hi group 45-ah ṭhen a ni a, group khatah hian item eng emaw zat a awm. Group pasarihah chuan entry tax 2% lak a ni a, a bak zawngah chuan 4% lak a ni thung.

Taxation department chhiah hmuh dan

Kum Profession Tax Sales Tax Entertainment Tax TOTAL

2007-08 Rs. 5,21,97,413 Rs. 64,47,18,179 Rs. 34,61,787 Rs. 70,03,77,379

2008-09 Rs. 5,63,12,381 Rs. 77,57,46,649 Rs. 32,24,453 Rs. 83,52,83,483

2009-10 Rs. 7,73,81,614 Rs. 80,32,87,261 Rs. 38,59,450 Rs. 88,45,28,325

2010-11 Rs. 8,36,48,781 Rs. 1,05,13,08,206 Rs. 47,62,177 Rs. 1,13,97,19,164

2011-12 Rs. 11,67,78,191 Rs. 1,37,37,65,833 Rs. 43,80,136 Rs. 1,49,49,24,160

2012-13 Rs. 13,69,98,014 Rs. 1,71,13,44,604 Rs. 45,85,568 Rs. 1,85,29,28,186

2013-14 Rs. 14,88,46,468 Rs. 1,85,07,84,572 Rs. 48,17,659 Rs. 2,00,44,48,699

2014-15 Rs. 14,34,08,188 Rs. 2,11,97,12,907 Rs. 97,83,130 Rs. 2,27,29,04,225

2015-16 Rs. 15,38,58,822 Rs. 2,33,60,36,793 Rs. 77,13,729 Rs. 2,49,76,09,344