Lungawi loh vangin bawnghnute leihbua

Champhai leh a chhehvela bawng vulhtute chuan, an lungawi lohna lantirna atan May 26, 2016 khan Champhai District Milk Producer Cooperative Union Ltd. (CHAMUL) hmun, Champhai tualah bawnghnute an leihbua.

Bawng vulhtute chuan, CHAMUL-ah hian bawnghnute an hralh ṭhin thu sawiin, "December, 2015 aṭang khan kan bawnghnute man kan la dawng lo a, hei vang hian nasa takin harsatna kan tâwk. Bawng vulhtu ṭhenkhat phei chuan sum indaih lohna vangin an bâwng an tiral tawh a ni," an ti.

Bawng vulhtute sawi danin, bawnghnute man an dawn loh vanga harsatna an tawh lai hian, May 25 zan aṭang khan CHAMUL-ah bawnghnute an hralh thei tawh loh tur thu an hria a; chuvang chuan CHAMUL-a bawnghnute hralh tura an tihsate chu an leihbaw ta a ni.

Bawng vulhtute hian CHAMUL-ah hian chawhrualin ni tin bawnghnute litre 800 vel an chhûng lut ṭhin a, tuna bawnghnute man tangkhang chu cheng nuai 40 vel a ni.

Hetih lai hian, CHAMUL Board of Directors-te chuan May 26 tlai khan bânna an thehlut nghal a; an bânna thehluhah hian society-te'n báng tura an nawr thu tarlan a ni.