KHAWTHLIR

Awmpuii tel dawn

Kumin May 29 - 4 June chhung hian Canada khawpui Ottawa-ah Commonwealth Parliamentary Association buatsaihin, 13th Canadian Commonwealth Parliamentary Association seminar buatsaih a ni dawn a, MLA Vanlalawmpuii Chawngthu pawh a tel dawn a, nimin khan Aizawl chhuahsanin Delhi a pan a, vawiinah Delhi aṭangin Canada an pan ang. Seminar thupui tur chu 'Strengthening democracy and the role of parliamentarian : Challenges and solution' tih a ni.

VC thlan result

Mara Autonomous District Council (MADC-a pathum - Serkawr, Theiri leh Lotai khuaa May 26, 2016-a V/C bye-election neih chu result a hriat tawh. Seat panga awmna Serkawrah MDF-in seat pathum lain an chak a; seat panga awmna Theiri-ah INC-in seat pali lain an chak a; seat pali awmna Lotai-ah INC leh MNF ten seat pahnih ve ve lain an inhnehtawk a ni.

Zirlai thlah

Higher and Technical Institute, Mizoram (HATIM) Lunglei chuan Ningani khan Saikuti Hall-ah Graduation Ceremony an buatsaih a, parliamentary secretary (School Education) Joseph Lalhimpuia'n a hmanpui. Graduation ceremony-ah hian zirlai degree course zo tur mi 64 an thlah a ni.

Horti Fair khâr

May 24, 2016-a ṭan, Assembly Annexe building chhawng hnuaia Horti Fair 2016 chu nimin khan khâr a ni. Fair neih chhung hian dawr 103 hawn a ni a, nimin chhun dar 12 thleng khan Rs. 31,86,520 man an hralh chhuak a ni.

Zirlai chawimawi

St. Paul’s Higher Secondary School chuan, nimin khan an sikulah High School Leaving Certificate leh Higher Secondary School Leaving Certificate-a an sikul aṭanga zirlai tiṭhate chawimawina hun an buatsaih a, parliamentary secretary KS Thanga'n a hmanpui.