MLPC Act ennawntu tur din a ni dawn Committee din thuai a ni ang: HM Zira

Home minister R Lalzirliana chuan, Mizoram Liquor (Prohibi-tion and Control) Act (MLPC Act) chu Mizoram tana a ṭhat leh ṭhat loh zir chiang tur committee din thuai a nih dawn thu a sawi.

R Lalzirliana hian nimin khan Congress Bhavan-ah thu sawiin, MLPC Act chu Congress sorkarin a siam a nih avangin, ram leh hnam tana ṭha lo a nih chuan a sût leh mai tur thu a sawi a, "Tun aṭanga rei loteah MLPC Act a ṭhat leh ṭhat loh zir chiang tur mithiam rual awmna committee kan din dawn a, anni hian uluk takin an zir chiang ang. Zoram mipui tam zawk ṭha tih dana kal hi kan duh," a ti.

Home Minister chuan, politi-cal party-te'n sorkarna an chan hunah zu zawrh tihtawp an tum thu an sawi lo nia sawiin, "MNF-te pawhin zu zawrh hi sawisel mah se, zu zawrh diltu tam tak chu an party mi leh sate an ni," a ti a; MNF mi leh sa zu zuar mekte pawh an awm thu a sawi.

Ruihhlo vanga police thi an tam tih sawi awm chu thu dik a ni tih sawiin R Lalzirliana chuan, "Tun hma aṭangin ruihhlo vanga police nunna chán hi an tam reng. MLPC Act hman vanga a ni lo. Police-te hi ruihhlo bâwih ata an chhuah theihna atan theihtawp kan chhuah mek a, ṭan kal la zel dawn a ni," a ti.

Home Minister sawi danin, police zingah ruihhlo vanga buai mi 300 vel chu an taksa, rilru leh thlarau lamah chak tharna an chan theihna atan an pualin Zuangtuiah gospel camping neih mek a ni. Police-te chu zu an in ṭan hun leh eng sorkar hun laia lak nge an nih chhinchhiah vek a ni a, MLPC Act hmaa zu in leh MNF hun laia lak deuh vek an ni. Mahse, eng hun laia lak pawh ni se, ruihhlo laka an fihlim theihna atan sorkar chuan theihtawp a chhuah dawn.

Police-te chu Zuangtuia cam-ping aṭanga an chhuah hnuah thla thum chhung hmun khatah dah leh an ni dawn a, chutah chuan an taksa hriselna turin theihtawpa enkawl an nih dawn bakah, a ṭul huna che chhuak thut thei reng tura buatsaih an ni ang.