NEC Meeting-ah Mizoram mamawh thlen

May 26-27 chhunga Pinewood Hotel Convention Centre, Shilllong-a North Eastern Council (NEC) Plenary Meeting vawi 65-naah Governor Lt.Gen. Nirbhay Sharma chuan thu a sawi a, Mizoram leh hmarchhak state-te hmasawnna tura rawtna hrang hrang a thlen.

Lt.Gen. Nirbhay Sharma chuan, hmarchhak state-te chu India Act East Policy hlawhtlinna tura hmun pawimawh a nih avangin sorkar laipui leh NEC tan ngaih pawimawh a ṭul thu leh NER Vision 2020 tihhlawhtlin thuai ṭha a tih thu a sawi a; chutih rualin, harsatna inang tam tak an nei tih sawiin, "State tinte harsatna ngaihthah palh a hlauhawm hle," a ti.

Governor chuan hmarchhak state-te hmasawnna tura rawtna pali a thlen a; chungte chu - inkalpawhna leh inbiakpawhna ṭha, ramri dep khuate hmasawnna tihchak, Skill development ngaih pawimawh leh lirnghing vanga khuarel chhiatna laka inven dan ngaihtuahte a ni.

Central scheme hrang hrangte leh 10% gross budgetary support-te bakah, ṭanpuina awm thei dangte NE tan rua-hman belh ni thei se a duh thu a sawi bakah, NEC meeting kum tina neih bakah, thla ruk emaw, thla thum danah emaw neih ṭhin ni se ṭha a tih thu a sawi bawk.

NEC Meeting-ah hian chief minister Lal Thanhawla pawh a tel a ni.