Covid-19: Mizoram dinhmun Chhuahtir tawh zat 95.05%

October 12, Thawhṭanni khan Mizoramah Covid-19 vei mi 18 hmuh chhuah a ni a, an zingah Mizoram chhunga kái chhâwng leh kài chhan hriat loh an awm nual. Nimin khan negative tawh mi 46 chhuahtir niin, a pumpuiah 95.05% an chhuak tawh.

Thawhṭannia swab sample endiknaa Covid-19 vei hmuh chhuahte chu mipa 16 leh hmeichhia pahnih an ni a; Lunglei Civil Hospital-a hmuh chhuah mipa panga, Kolasib District Hospital-a hmuh mipa pariat, Serchhip District Hospital-a hmuh mipa pakhat, Rapid Antigen Test hmanga Aizawl leh Mamita hmuh mi pahnih ve ve an ni. ZMC laboratory-a endikte an negative vek.

Nimin khan mi 46 chhuahtir an ni a; SRH-ZMC aṭangin pathum an chhuak a, covid care centre pathum - Berawtlang, Champhai leh Chhiahtlang aṭangin mi pahnih ṭheuh an chuah bakah, Lawngtlai CCC aṭangin mi 37 chhuahtir an ni.

Mizorama Covid-19 positive hmuh chhuah tawh chu mi 2,202 an ni a, mipa 1,815 leh hmeichhia 387 an ni. An zinga mi 2,093 (95.05%) chu chhuahtir an ni tawh a, enkawl mek mi 109 (4.95%) an la awm.

Nimin thlenga Mizorama hripui vei hmuh tawh mi 2,202 zinga mi 1,555 chu state pawn aṭanga rawn lut an ni a, mi 647 chu Mizoram chhunga kái chhâwng an ni.

October 12, Thawh­ṭanni khan state pumah swab sample 1,244 endik a ni a, chu'ng aṭang chuan hripui vei mi 18 hmuh chhuah a ni. ZMC-ah sample 462 endik a ni a, district pasarihah TrueNAT-PCR hmangin sample 109 leh RAT hmangin district pakuaah sample 673 endik a ni bawk.

Sorkar thuchhuah tarlan danin, Thawh­ṭannia RAT hmanga Aizawla Covid-19 vei hmuh chhuah pahnihte chu hmeichhia ve ve, kum 22 leh 29-a upa an ni a, Chanmari West leh Dawrpui venga mi an ni. Dawrpui venga mi hian Covid-19 symptom a nei a, Chanmari West-a mi erawh chuan harsatna a nei lo a, hri an kaina âwm hriat mai theih a ni lo.

RAT hmanga hmuh chhuah Mamit district-a mi pahnih chu unau mipa naupang pahnih kum 13 leh 11  an ni a; an chhungkuain tun hnaia Assam aṭanga rawn haw niin, a naupang zawkin Covid-19 symptom a nei.

October 12 vêk khan TrueNAT-PCR hmangin Lunglei Civil Hospital-ah mipa panga, kum 27-42 inkar, Lunglei Kawmzawla awm Assam Rifles mi vek hmuh chhuah a ni a; tun hnaiah state páwna zin chhuahna an neih loh avangin Mizoram chhunga kai an nia ngaih a ni.

Vairengteah hripui vei mipa pariat, symptom nei lo vek hmuh chhuah a ni a; chu'ngte chu kum 29-60 inkar, Counter Insurgency & Jungle Warfare School (CIJWS), Vairengte mi leh sa vek niin, Mizorama kai chhawng vek an ni. An zinga paruk chu sipai (army) niin, Masimpur, Assam-a Military Hospital-ah lak an ni a, mi dang pahnih chu civilian, CIJWS-a thawkte niin, Kolasib CCC-ah enkawl an ni ang.

RAT hmang vekin Thawhṭanni khan Serchhipah hripui vei mipa kum 40 mi hmuh chhuah a ni a; amah hi Bhavya Construction hnuaia thawk, tun hnaia Assam aṭanga rawn lut, quarantine facility-a awm lai a ni.