Speaker-in Phullen lei tawlh a enfiah

Assembly speaker Lalrinliana Sailo chuan a bial chhunga Phullen khawlaia tun hnaia lei tlahniam chu nimin khan a hmunah a tlawh a; chhawmdawlna awm thei angte sorkarin a ngaihtuah mek thu a sawi.

Lalrinliana Sailo chuan lei tawlhna hmun a tlawh zawhah Phullen community hall-ah vantlang inkhawm tâwi a neihpui a; lei min leh tawlh vanga chhiatna tâwkte a tawrhpui thu sawiin, "Chhawmdawlna sorkar aṭanga awm theite ruahman mek a ni," a ti.

Kawng bal vanga mipui harsatna a hriatthiampui thu sawiin, "Lei tlahniam a hmuna endiktu mithiamte'n an hmuh dante an thlirho leh hnuah a ṭul anga hmalak a ni ang," a ti.

Phullen khaw chhungah hian October 2-3, 2020 khan lei a tlahniam a, kawngpui pawimawh state highway pawh a bal vek a ni. Lei tawlhna hmun hi geologist-te'n an hmanruate nen an endik mek zel a ni.