AMC inthlan hun a la hriat loh Political party-te chak an inring

Aizawl Municipal Corporation (AMC) inthlan hun tur tihfel a la ni lo a, State Election Commisison (SEC) chu inthlang turin a inbuatsaih mek zel. AMC inthlanah political party-te'n beiseina sang tak an nei a, chak an inring hlawm.

Tuna AMC councillor ni mekte hi November 26, 2015 khan thlan tlin an ni a, December 10, 2020 hian an term a tawp dawn. SEC chuan AMC inthlan hun turah Mizoram sorkar aṭangin rawtna an la hmu lo. Chutih rualin, SEC chu inthlang turin a theih ang angin a inbuatsaih zel a, electronic voting machine (EVM) an la khawm ṭan tawh.

Vanglaini palai zawhna chhangin SEC hotute chuan, Mizo­ram sorkarin inthlan hun tur atan rawtna a neih hunah ṭha taka inthlan buatsaih turin an inbuatsaih mek thu an sawi.

AMC-ah hian ward 19 a awm a, chu'ng zinga paruk chu hmeichhe tana hauh a ni ṭhin. AMC inthlan lo awm turah hian ward no. III, VIII, X, XIV, XVI leh XIX-te chu hmeichhe seat tur a ni.

Vanglaini palai chuan AMC inthlan neih tur chungchangah MNF, INC, ZPM, BJP leh Peoples' Conference Party hruaitute a be kual a, MNF, INC leh ZPM chuan sorkarna an siam theih ngei an inrinthu an sawi hlawm.

MNF vice president Vanlalzawma chuan Vanglaini palai zawhna chhángin, AMC inthlanah ward zawng zawngah candidate an siam tur thu a sawi a, "Party dang thawhpui tumna kan nei lo. Candidate tur kan la tifel lo a, vawi khat chiah Nomination Committee kan la ṭhu. Sorkar siam ngei turin beiseina kan nei sang khawp mai," a ti.

Vanglaini palai zawhna chhangin MPCC treasurer Zodintluanga chuan, AMC inthlanah party dang thawhpui neih an tum loh thu a sawi a, "Tunah hian candidate tur kan buaipui mek a, kan la tifel lo," a ti a; beisei an neih sàn leh sàn loh zawhna chu, "Sorkarna kan siam ngei ang chu le," tiin a chháng.

ZPM vice president Lalthansanga chuan, AMC inthlanah sorkarna siam turin beiseina sang tak an neih thu Vanglaini palai a hrilh a, "Party dang nena thawhho tumna kan nei lo. Tunah hian candidate tur kan buaipui mek a, 80% vel chu kan tifel tawh," a ti.

Mizoram BJP president Vanlalhmuaka pawhin AMC-ah candidate neih ngei an tum thu Vanglaini hrilhin, "Inthlan a nih chuan kan chuh ve ngei ang chu. Ward eng zat nge kan chuh dawn kan la rél lo a, candidate chu kan nei ngei ang," a ti a; assesment an la tih loh avangin beiseina an neih san leh san loh a la sawi thei lo.

Vanglaini zawhna chhangin Peoples' Conference party vice president V Lalṭhazuala chuan, AMC inthlan chuh ngei an tum thu a sawi a, "Party naupang tê kan nih avangin kan la che chak thei lo a, hma kan la mek. Thawhpui neih kan tum lêm lo a, kan duh ang duh min thawhpui duh an awm chuan kan inhawng thung. Party chakna piah lamah mipui puihnain seat lak beiseina kan nei," a ti.

1.    Ward-III: Ramhlun North, Ramhlun Venglai, Ramhlun Vengthar, Ramhlun Sports Complex, Laipuitlang

2.    Ward-VII: Armed Veng, Armed Veng South, Chite

3.    Ward-X: Chawnpui, Zotlang, Zonuam, Govt. Complex

4.    Ward-XIV: Khatla, Khatla South, Mission Vengthlang

5.    Ward-XVI: Bethlehem Veng, Bethlehem Vengthlang, College Veng

6.    Ward-XIX: Kulikawn, Tlangnuam, Saikhamakawn, Melthum, Hlimen