Green Mizoram Day hman a ni; Thing ṭiak 45,63,326 phun/sem tawh

Nimin June 11 kha Green Mizoram Day a ni a, Mizoram hmun hrang hrangah hman a ni. Aizawlah chuan Berawtlanga Mul­tipurpose Cultural Complex Auditorium-ah hman a ni a, minister C Lalsawivunga'n a hman­pui. Green Mizoram prog­ramme pualin Mizoramah thing ṭiak 17,56,160 phun a nih tawh bakah, thing ṭiak 28,07,166 sem a ni tawh tih tarlan a ni.

Green Mizoram Day hman­naah hian khuallian C Lalsawivunga chuan, kum 1999 aṭanga Green Mizoram programme hman a ni chu thil ṭha, chhunzawm zel tlak a nih thu a sawi a, "Thing kan phun hian awmze neia kan phun a ṭul a, thing phunna hmun atana kan thlan khan eng angin nge thil ṭha a thlen dawn tih leh thing phun tur kan thlan chu eng anga ṭangkai nge a nih dawn tih kan chhût tel ṭhin a pawimawh," a ti.

C Lalsawivunga chuan, Mizorama ramngawte a chereu zel tih sawiin, "Tun hmaa ramngaw kan tih ṭhinte kha tunah chuan thing awm mumal lohna a tam tawh hle. Sorkar department-te'n theihtawp chhuah mah se, mipui thlawpna tel lo chuan awmzia a awm lo," a ti a; ramngaw leh nungcha humhalh tura thawhpuiah Mizo mipui a sáwm.

Inkhawmah hian Assembly speaker Lalbiakzama pawhin thu a sawi a; district 11 zinga kângmei vênnaa hma la ṭha te, Aizawl district-a kângmei vêng ṭha khuate leh mimal thing phun hna thawk ṭhate hnenah lawmman hlan a ni. Inkhawm zawhah Zokhawsanga Assam Rifles hmunah thing ṭiak eng emaw zat phun a ni.

Mizorama district 11 zinga kângmei vêng ṭha ber chu Kolasib district an ni a; Aizawl district-a kângmei veng ṭha khuate chu - pakhatna Lamchhip (Rs 50,000), pahnihna Kepran (Rs 30,000) leh pathum Seling (Rs 20,000)-te an ni. Thing phun lama thawk ṭha mi pathum - PC Malsawma, West Phaileng, PC Lalrinzuala, Maite leh H Zakunga, Sihphir Venghlun te hnenah lawmman hlan a ni bawk.

Kum 1998 khan Chief Minister kaihhruai Aizawl leh a chhehvela thing leh mau humhalhna lama hma latu tur Green Aizawl Committee din a ni a, Committee chu kum 1999 khan Mizoram pum huap tura tihlen niin, Green Mizoram Committee tia thlak a ni. Mizoram sorkar chuan kum 2014 khan June 11 chu Green Mizoram Day atan a puang.

Environment, Forest & Climate Change department chhinchhiah danin, Green Mizoram Committee din a nih kum 1999 aṭanga kum 2023 thleng khan Mizoramah thing ṭiak 17,56,160 phun a ni tawh a, thing phun tur 28,07,166 sem a ni tawh bawk. Thing ṭiak phun tawh leh sem tawh belh khawm chu 45,63,326 a tling.

KÂNGMEI VENG ṬHA DISTRICT

1-na    Kolasib district

2-na    Lawngtlai district

3-na    Mamit district