CYMA leh kohhran ṭhalaite'n ruihhlo do dan tur an sawiho

Central YMA hruaitute chuan nimin khan CYMA Committee Room-ah kohhran pawl hrang hranga ṭhalai pawl hruaitute an kâwm a, ruihhlo donaa hmalak dan tur an sawipui.

Inkawmhona hi CYMA president Lalhma­chhuana'n a kaihruai a; CYMA hruaitute bakah, Central KṬP, MṬKP, General PYD (UPC-NEI), General PYD (UPC-MZ), Salvation Army Youth, Adventist Youth Fede­ration, LIKBK Ṭhalai Pawl, Evangelical Church of Maraland KTP (Aizawl) leh Catholic Ṭhalai Pawl aiawhte an tel.

CYMA hruaitute leh kohhran ṭhalai pawl hruaitute hi March 26, 2024 khan an lo ṭhu­khawm tawh a, chumi ṭum chuan thawhho zel dan tur ngaihtuahtu tur Coordination Committee an din. Nimina an ṭhut­khawmah hian hmalakna hmasa atan ruahmanna an duang a ni.

RUAHMANNA AN DUANTE

◆ Kohhran hrang hrang ṭhalaite'n mahni huam chhunga zirna in leh sunday school-ah ruihhlo ṭhat lohzia inzirtirna kalpui ni se. Hei hi kohhran ṭhalai pawl tin headquarters leh central lamte'n lo bawhzui se.

◆ Kohhran ṭhalai pawl tinte'n mahni huam chhunga an member ruihhlo ngai zat chhinchhiah a, August 2024 chhungin Coordination Committee-ah thehluh ni se. Hemi kawngah hian a ṭul angin YMA branch-te thawhpui ni se. Ruihhlo ngaite'n nunphung pangngai an zawh theihna turin hmalak ni se.

◆ Kohhran ṭhalai inkhawmnaah ruihhlo do a ṭulzia sawia hun hman ni se.