Sports minister-in an hmalaknate a sawi
Minister of state Robert Romawia Royte chuan nimin khan Lunglei Circuit House conference hall-ah thuthar thehdarhtute a kâwm a, a department chan hnuaia Lunglei district-a hmalakna leh hmachhawpte a tarlang.
Robert Romawia chuan, 2 Mizo Battalion NCC thar din a nih thu sawiin, "Council of Minister chuan February 12, 2019 khan Lunglei khawpuia 2 Mizo Battalion NCC thar din a remti a, Sazaikawnah battalion headquarters hawn a ni ang. A rang thei ang bera function tir tum a ni," a ti.
Lungleiah district sports complex din tum a nih thu sawiin Minister chuan, "Cheng nuai 4919.31 approval hmuh tawh a ni a, sum sanction beisei mek a ni," a ti a; complex-ah chuan football, athletic, futsal, basketball leh volleyball khelhna leh tihna tur bakah, indoor hall, gymnasium leh music centre-te a awm tur thu a sawi.
Sports Minister chuan, Zobawkah Mizoram State Sports Academy din a nih tur thu sawiin, "Academic building, hostel bulding, football ground, phûl lem, basketball court, gymnasium, volleyball court leh a dangte a awm ang a, zirna ṭha taka kalpui chungin sport thiamte dah an ni dawn. Cheng nuai 3430.90 sanction a ni tawh a, 50% dawn a ni tawh," a ti.
Hmasawnna ruhrel din turte chu bialtu MLA-te nen uluk taka inráwn chung leh ṭanghoa ruahman ṭhin a nih thu sawiin, "Ṭhalaite leh infiammite'n an hman ṭangkai ngei kan beisei," a ti a, ruahmanna an neihte chu mipuite'n an hman ṭangkai vat theihna atan theihtawp chhuah chhunzawm zel a tum thu a sawi.
Minister hian a department chan hnuaia hmasawnna hna kal mekte a hmunah kalin a enfiah a, hmalak zel dan tur official-te leh khawtlang hruaitute ruahmanna a siam pui nghal.
Robert Romawia hi Lunglei HPC vice chairman Lawmawma Tochhawng, Lunglei South bialtu MLA Dr K Pachhunga leh Mamit bialtu MLA H Lalzirliana ten an ṭawiawm a ni.
Robert Romawia thusawi dang
. Lunglei Salem Vengah MSSC compound cheng nuai 1108.70 senga din tur a ni a, approval minute a chhuak tawh a, sanction thuai beisei a ni.
. Electric Veng field chei ṭhain phûl lem phah tum a ni a, cheng nuai 812.98 approval minute dawn a ni tawh.
. Lunglei khawpui hmun hnihah futsal ground din tum a ni a, Ramthar Veng leh Venghlun en a ni dawn. Project atan hian cheng nuai 637.31 approval minutes dawn a ni.
. Zotlang Tourist Lodge tihchangtlunna turin project siama thehluh a ni. Sum sanction la hmuh a ni lo a, hmuh ngei erawh beisei a ni.
. Council of Minister-in October 1, 2020 khan ‘The Mizoram Telecom Infrastructure Policy, 2020’ a pawm a, Lunglei district leh Mizoram hmun hrang hrangah ICT hmalakna tihchangtlun tuma hmalak mek a ni.