CM hlui fapa complaint thehluhah police-in report an thehlut tawh

Chief minister hlui Zoramthanga fapa, Ramthansiama, Ramhlun Venglai-in court-a criminal complaint a thehluh chu Cyber Crime Police Station-in an chhui zo tawh a, court-ah report an thehlut tawh.

Ramthansiama hian January 18, 2024 khan Aizawl District Court-a judicial magistrate first class HT Lalmawizuala hnenah criminal complaint a thehlut a; court chuan chhui chiang turin Cyber Crime Police Station a hriattir a ni.

Cyber Crime police-te chuan March 26, 2024 khan court-ah report an thehlut a, mahse, Ramthansiama criminal complaint thehluh nena inhnamhnawih Facebook-a David Sailo page neitu/enkawltu an la hriat chhuah loh avangin hun pek belh an dil.

Police report-ah hian Ramthansiama complaint thehluha inhnamhnawih dang Zosangzuala (Sena Zote), Phullen khua chu chhui chhuah a nih thu tarlan a ni. Zosangzuala hian Whatsapp-a group pakhat 'Phullen Politics' ah Kolkata Mizo­ram House, Ballygunge hmun hnam dang hminga leiah a leitu tak tak chu CM hlui Zoramthanga fapa niin a ziak (post) a ni.

Zosangzuala hi Cyber Crime police-te chuan an ko tawh a, mahse, zunthlum leh thisen sang a neih avanga zin chhuah a harsat thu chhuanlama hmangin police hmaah a la inlan lo nia hriat a ni.

Police-te chuan an report pahnihna chu June 10, Thawhṭanni khan court-ah an thehlut leh a, David Sailo inti chu thubuai danga an lo man tawh R Lalchhuanmawia, Zemabawk Galilee Veng ni ngeia an hriat thu an tarlang.

David Sailo inti hian January 11, 2024 khan Kolkata Mizoram House ram hralh chu Ramthansiama nen thlunzawm theih­na lam hawi a post a ni.

Complaint a thehluhnaah hian Ram­than­siama chuan, dâwta puh a nih thu leh a pa pawh nasa taka tihhmingchhiat a nih thu a tarlang a, "A nghawng tur hre sain, keimah leh ka pa tihhmingchhiat vek leh, mipui náwlpui rilrua kan dinhmun hnuh hniamsak leh, kan zahawmna tihchhiatsak vek an tum tih a chiang," a ti.

Ramthansiama chuan, dâwta amah puhtute'n IPC Section 499 an bawhchhia tih tarlangin, dan anga hrem an nih theih nan hma la turin court a ngen a ni.