Transfer sût tura insawipui hi sim a ṭha - DPAR Minister
Department of Personnel & Administrative Reforms (DPAR) minister K Sapdanga chuan nimin khan Administration Training Institute (ATI) Hall-ah Combined Civil Services Foundation Training, 2023 batch a hawng. Minister chuan, "Transfer sût lêt tura insawipui hi sim a ṭha," a ti.
K Sapdanga chuan, officer tharte chu Mizoram sorkar tinghettu, sorkar innghahna leh a thîr ruhrel an nih thu sawiin, "In hnathawhte rawngbawlna angah ngai ang che u. Sorkarin officer-te chu hman ṭangkaina turah a transfer thei a, transfer sût lêt tura insawipui hi sim a ṭha," a ti a; sorkar hotute'n transfer & posting an siam reng reng chu a ṭha ber tur ruahmanna nena siam a nih ṭhin thu leh thuawih taka zawm tlàn a ṭhat ber thu a sawi.
Officer tharte chu an mawhphurhna sang tak hre tura chahin DPAR Minister chuan, "Sorkar hnathawkte phuartu danin a phal leh phal lohte chiang takin hria u la, zawm ang che u," a ti.
DPAR secretary K Lalthawmmawia'n officer tharte tana tih tur leh mawh-phurhnate a sawi a; Mizoram Civil Service Association president V Lalengmawia, Mizoram Police Service Association president Zosangliana, Mizoram Infor-mation Service Association president Malsawmsanga leh Mizoram Finance & Accounts Service Association vice president Laldinpuia ten thu an sawi bawk.
Foundation training-ah hian MCS 10, MIS panga leh MFAS 12-te an tel a; an training chhung zawng ATI Hostel-ah an awm dawn a ni.