State pumah Green Mizoram Day hman a ni

Nimin khan Mizoram hmun hrang hrangah Green Mizoram Day hman a ni a, thupui chu 'I nunna atan thing phun rawh' tih a ni. District hrang hranga Day hmannaah an district chhunga kângmei vennaa thawk ṭha khuate hnenah lawmman hlan ṭheuh a ni a; pakhatna hnenah Rs 50,000, pahnihna hnenah Rs 30,000 leh pathumna hnenah Rs 20,000 ṭheuh hlan a ni.

Green Mizoram Day hi Lungleiah chuan Theiriata TNT Complex-ah hman a ni a, bawrhsap Ramdinliani'n kaihruaiin, minister Lalrinpuii khuallian a ni. Lunglei district-a kângmei veng ṭha khuate hnenah khuallianin lawmman a hlan a; pakhatna Bualte, pahnihna Sairep leh pathumna Bualpui-V te an ni.

Day pual hian Lungleia sorkar department 40 leh pawl hrang hrang 10-a mite'n Hrangchalkawn leh Ṭawipui North inkar NH-54 kawngpui kamah thing ṭiak 1,166 an phun. Thing an phunte chu - Tlaizawng, Herhse, Chawnpui, Makpazangkâng, Cháwmzil, Khuangthli, Tufar, Lenhmui, Pangkai, Nghalchhun, Theihai, Sunhlu, Tûm, April-par pawl, Litchi, Búl, Theitât, Tei, Reraw, Lamkhuang, Mualhawih leh Nauvabuan-te a ni.

Siahaah chuan MADC Forest Conference Hall-ah Green Mizoram Day hman a ni a, MADC chief executive member M Laikaw-in a hmanpui. Day puala thing phun hnatlangah sorkar department-te chu pawl hnihah inṭhenin, Tisopi kawng leh Tuipui-Ferry panna kawngpui kamah thing ṭiak eng emaw zat an phun.

Day hmannaah hian kumin ṭhál laia kângmei veng ṭha khuate hnenah lawmman hlan a ni a; pakhatna Chheihlu, pahnihna Saikao leh pathumna Amobyu Vaithie te an ni. Kângmei vên pawimawhzia tarlang ṭha chanchinbute hnenah lawmman hlan a ni bawk a; pakhatna Maraland, pahnihna Kawleng leh pathumna Moonlight te an ni.

Champhaiah chuan Mangkhaia Hall, Champhai Zotlangah Green Mizoram Day hman a ni a, adviser to CM (technical) H Ginzalala, Champhai North bialtu MLA-in a hmanpui. Inkhawm zawhah NH-06 - Chhungte khaw hnuai aṭanga Tuipui lei inkar kawngpui kama hmun 40-ah Tlaizawng ṭiak 864 leh April-par ṭiak 200 phun a ni.

Day hmannaah hian kângmei vêng ṭha khuate hnenah lawmman hlan a ni a, pakhatna Ruantlang, pahnihna Thekpui leh pathumna Lungphunlian khuate an ni. 'Engtin nge Champhai district kângmei lakah a fihlim theih ang' tih thupui hmanga essay inziahsiak lawmman sem a ni bawk.

Green Mizoram Day hi Kolasib district chuan Mizo 1st IR Headquarters, Mualvumah an hmang a, Assembly deputy speaker Lalfamkima'n a hmanpui a, bawrhsap John LT Sanga leh Kolasib SP David H Thangliana, sorkar department hotute leh pawl aiawhte an tel.

Day hmanna inkhawm zawhah Mualvumah thing ṭiak 300 an phun a; vawiinah khaw hrang hrangah thing phun hnatlang neih zui a ni dawn. Kângmei veng ṭha khuate hnenah lawmman hlan a ni a, pakhatna Bairabi North, pahnihna Bilkhawthlir North leh pathumna Bukpui te an ni.

Serchhip District Committee on Green Mizoram huaihawtin DC Conference Hall-ah Green Mizoram Day hman a ni a, bawrhsap David Lalthantluanga khuallian a ni. Inkhawm zawhah Kikawn leh Bûkpui inkarah thing ṭiak eng emaw zat an phun.

Kumin ṭhâl laia kângmei vêng ṭha khuate hnenah lawmman hlan a ni a; pakhatna Chhingchhip Mualpui, pahnihna Serchhip Dinthar leh pathumna Sailulak te an ni.

Lawngtlaiah chuan DC pisa tualah Green Mizoram Day hawnna inkhawm buatsaih a ni a; chumi hnuah Day pualin Lawngtlaia sorkar department hrang hrang, zirna in, MJA leh tlawmngai pawlte'n Kaladan Multi Modal Transit Transport Project (KMMTTP) kawngpui sir, Lawngtlai aṭanga km. 14 vela hlâah thing ṭiak 342 an phun.

Lawngtlai district-a kângmei veng ṭha khuate hnenah lawmman hlan a ni a; pakhatna Râwlbûk, pahnihna Mámpui leh pathumna Mualbu-L an ni.

Mamitah chuan Nagar Van Yojona-ah Green Mizoram Day hman a ni a, bawrhsap VL Remliana'n a hawng. District chhunga kângmei veng ṭha ber Kanghmun, pahnihna Darlung leh pathumna Tuidam hnenah lawmman hlan a ni; Day pualin JNV campus-ah thing ṭiak 150 phun a ni.

Mamit DFO C Lalrinmuana sawi danin, Mamit district-ah Green Mizoram Day hman a nih aṭanga 2023 thlengin thing 1,17,540 phun a ni tawh.

Green Mizoram Day pualin Saitualah chuan DC Bungalow-ah inkhawm buatsaih a ni a, bawrhsap Dr Lalngura Tlau-in hmanpuiin, sorkar hnathawk, tlawmngai pawl, sikul leh college zirlaite an tel. Inkhawm zawhah Saitual leh a chhehvelah thing ṭiak eng emaw zat an phun a; Ngiau, Khuangthli, Lamkhuang, Theihai, Tlaizawng, Thlado, Vaube leh thei leh thing pár chite an phun a ni.

Khawzawlah chuan DC auditorium-ah Green Mizoram Day hman a ni a, additional DC Lalfakzuala khuallian a ni. Day pualin NH-06 kawngpuia Tuimuk lui kamah thing ṭiak 402 phun a ni. Green Mizoram Day hmannaah hian Kangmei Ven Hapta 2024 puala kângmei vêng ṭha khuate hnenah chawimawina hlan a ni a, pakhatna Vanchengpui, pahnihna Khawhai leh pathumna Khualen te an ni.

Green Mizoram Day hi Hnahthial district-ah chuan bawrhsap Chuauhnuna hoin Hnahthiala Vawkpui Lutar-ah hman a ni a, sorkar hnathawk te, zirlaite leh tlawmngai pawlte telin, thing ṭiak an phun. Hmun parukah thing phunna hmun tur ruahman a ni a, Vawkpui Lutar aṭanga Thiltlang inkarah thing 290 an phun a ni.

Green Mizoram Day hi State NSS Cell ruahman angin NSS unit hrang hrangte'n an hmang. NSS anga hmanna pui ber chu Aizawl-Lunglei kawnga NSS Platation Site, Hmuifangah neih a ni a, Aizawla zirna-in 20 chuanga NSS volunteer-te'n thing an phun ṭheuhte an hung ṭha a ni.

Gauhati High Court, Aizawl Bench pawhin nimin khan Green Mizoram Day an hmang a, Justice Nelson Sailo leh Justice Marli Vankung bakah, officer dangte'n Gauhati High Court, Aizawl Bench chhehvelah thing an phun.

Mizoram Pollution Control Board (MPCB) pawhin kum danga an tih ṭhin angin thing ṭiak phun tur ṭhahnem tak an la khawm a, sikul leh college hrang hranga eco club-te phun turin an sem chhuak a ni.