Governor-in Herhse ṭiak a phun

Green Mizoram Day 2024 pualin Governor Dr Hari Babu Kambhampati chuan nimin khan Raj Bhavan tualzawl (circular lawn)-ah Mizoram state tree - Herhse ṭiak a phun a; a nupui Dr Jayashree Kambhampati leh Raj Bhavan-a thawk officer-te'n an phun bawk.

Governor chuan, ramngaw chereu nasa vangin sik leh sa danglam mek tih sawiin, "Chhiatna lian tak tak thleng chho mekah hian khua leh tuite'n ram­ngaw humhalh pawi­mawhzia leh ram­ngaw siam tura ṭan lak a pawimawhzia kan hriat thar a ṭul. Ramngaw chereuin a nghawng - tuihna tlem tial tial te, khaw lum leh nungcha a nghawng dante hre tharin, a siamṭhat hna thawh kawngah khua leh tuite'n kan mawh­phurhna kan hriat thar leh a ṭul a ni," a ti.