Zirlai ti ṭha chawimawina hun hmang

St Paul’s Higher Secondary School chuan nimin khan kumin HSLC leh HSSLC-a an zirlai ti ṭhate lawmpuina leh chawimawina hun an hmang a, School Education minister Dr Vanlalthlana'n hmanpuiin, zirlai ti ṭhate hnenah Paulians' Proficiency Award a hlan.

Education Minister chuan, St Paul's HSS aṭanga zir chhuak a ni tih sawiin, zirlai ti ṭhate chawimawina hun a hmang thei chu lawmawm a tih thu a sawi a, "Zirlai tiṭhate chuan in taimakna leh tumruhna rah ṭha in hmu a, hei hi in bul ṭanna tur chauh a nih avangin in hma lam hun atan theihtawp chhuah zel ang che u," a ti.

St Paul’s HSS hlawhtlinna leh hmingṭhatnate chu zirtirtute an nih thu sawiin Dr Vanlalthlana chuan, Mizoram tana chhenfâkawm tur mi ṭha leh mi thiam chher chhuah kawngah theihtawp chhuah zel turin duhsakna a hlan a ni.