Minister-in taima turin zirlaite a fuih

Helen Lowry Higher Secondary School chuan nimin khan an sikulah Graduation Commencement vawi 26-na an hmang a, minister of state Lalnghinglova Hmar-in a hmanpui a; an hma lam hun atan taimâk leh tumruhna nen theihtawp chhuah turin a fuih.

Lalnghinglova Hmar chuan, zirlai hlawhtlingte a lawmpui thu sawiin, hlawhtlinna sang zawk nei zel turin duhsakna a hlan a, "Nakin huna in nih duh leh in nih tumte hi in zir tur subject leh in college luhna tur thlengin a inzawm vek a, tun aṭangin in tuina leh in thil tum chu ngaihtuah uluk u la, in nakin hun tur thlir chungin taimak leh tumruhna nen theihtawp chhuah ang che u," a ti.

Minister chuan, Mizo zingah IAS, IPS, etc. an tlem tawh thu leh chutiang ni thei tur chuan zir nasat a ṭul thu sawiin, "State sorkar hnuaia hna awmte hian a diltu zawng zawng a daih loh avangin sorkar hna chauh ni lo, mahni kutkawih hmanga eizawnna ṭha tak tak a awm," a ti a; zirlaite chu ruih theih thil laka inthiarfihlim tur leh fimkhur turin a chah.

Helen Lowry HSS-ah hian zirlai 1,285 an awm mek a ni.