Assam-in min zuam chhan chu kan intodelh loh vang - PC President

Peoples' Conference (PC) party president Lalhmangaiha Sailo chuan nimin khan thuchah tichhuakin, "Assam mi leh sate'n min nûthûri zuam reng mai chhan hi chu buh leh bâla kan intodelh loh vang te, state dangte nena inkalpawhna kawngpui ṭha kan neih loh vangte leh kawlphetha kan la tlâkchham vangte a ni ber,'' a ti.

Lalhmangaiha Sailo chuan, Brig. T Sailo-in ram tana chenfakawm tak tur, hmathlir thui tak neia PC sorkar laia a buaipui tawh chu Congress leh MNF sorkarin an chhunzawm loh thu sawiin, "Chuvangin buh leh bâlah kan la intodelh lo a, inkalpawhna kawngpui ṭha kan la nei lo a, kawlphetha kan la tlachham reng a ni," a ti a; ram dinhmunin a zir loh vangin Assam-in dik lo takin Mizoram leilung a hnehchhuh ngam niin a sawi.

PC President chuan, an party policy leh programme Six Basic Needs chungchang tarlangin, "Six Basic Needs hi hring chhuak tur chuan a chi paitu nih a ngai. Páwn lam mite'n neitu chan intichang ve viau  ṭhin mah se, a chi paitu tak tak tan lo chuan a hrin theih loh a ni,'' a ti.

Ṭhalaite mahni kêa dinga an intodelh theih nan hna thawh tur manhla tak tak chhawpsak turin electric power hnianghnar tak siam chhuah chu an thupui ber a ni tih sawiin Lalhmangaiha chuan, "Kan rama luipui luang remchang awm apiangah hydro electric power project bun kan tum dawn," a ti a; Mizoramin thil ropui leh rohlu a neih hunah ṭhenawm state-te'n an hlauh zawk tur thu a sawi.