KHAWTHLIR

YMA-in thisen pe

YMA, Bilkhawthlir Kawnveng Branch chuan nimin khan Bilkhawthlir North VC Hall-ah thisen pek huaihawtin, Kolasib District Hospital tan thisen unit 37 an pe a, petute mipa 26 leh hmeichhia 11 an ni.

Tanpuina tur hlan

North Eastern Development Finance Corporation Ltd. (NEDFi)-in an CSR aṭanga tun hnaia Cyclone Remal vanga Mizorama chhiatna tâwkte ṭanpuina tur Mission Foundation Movement (MFM) hnena Rs 25,00,000 an pek chu Chief minister Lalduhoma'n nimin khan MFM hruaitute hnenah a hlan.

CM leh IAF hotute

Chief minister Lalduhoma chuan nimin khan a pisaah Indian Air Force-a air vice marshall HA Rather, Air Defence commander leh a thawhpuite a kâwm a; Mizorama Indian Air Force hmalakna leh hmachhawpte a sawipui.

Vidyanjali sawiho

Central YMA leh Samagra Shiksha, Mizoram-te'n zirna tihhmasawnna tura thawhhona thuthlung an ziah tawh angin, June 10, Thawhṭanni khan Mamita BRC Hall-ah Vidyanjali chungchang sawihona buatsaih a ni. Vidyanjali hi sikul mamawh, hmanrua emaw thil tihsak (service) emaw hmanga mimal/pawl/khawtlang ten thil an thawhna tur a ni.

Inthlan hun puang

State election commissioner Laima Chozah chuan nimin khan Lawngtlai DC conference hall-ah Lai Autonomous District Council (LADC) hnuaia village council inthlanpui leh Lawngtlai Chandmary MDC constituency-a by-election neih hun atan June 27, 2024 ruat a nih thu a puang. LADC huam chhunga VC election leh MDC by-election-a chuh tumte tan June 18, 2024 tlai dar 3 thleng hming pek luh theih a ni a, June 21, 2024 chawhnu dar 1 thleng inhnuhdawh hun hawn a ni. LADC-ah hian VC 99 a awm a, chu'ngah chuan seat 595 a awm a ni.