Bialtu MLA-in Thinghlun a tlawh

Hachhek bialtu MLA Lalrindika Ralte chuan October 12, Thawhṭanni khan a bial chhung, Thinghlun rama Assam Police leh Forest mite'n October 9, 2020-a Mizo thlám an hàl leh thlai an suasamna hmun a tlawh a; Mizoram police-te hnenah leh police awmna tur in satu Langkaih group YMA hnenah ṭanpuina a hlân.

Lalrindika Ralte chuan, ramri humhalh chungchangah party, pawl leh mimal hamṭhatna aiin Mizoram himna a pawimawh ber thu sawiin, "Ram leh hnam leh ramri humhalh turin Mizoram mipui, kohhran, NGO-te leh political party zawng zawng kan ṭan rual a ngai," a ti a; a bial chhunga Assam sorkar chêt dan chu a dem tak zet thu a sawi.

Lalrindika Ralte hian Thinghluna Mizoram police-te awmna tur saa hnatlang Langkaih group YMA-te chu vawk talh tur a tumsak a; police camp awmna thleng motor kal theiha siam a nih theih nan JCB a thawh nghal. Ramria duty police-te hnenah hian buhfai, tél, dailuah leh solar lamp eng emaw zat a pe bawk.